Ich Stephan der Straeuzzer von Winndorf vnd ich Ann sein haussfraw vnd alle vnser eriben veriechen offenleich mit dem brief allen den die in
sechent hoernt oder lesent die nu lebent oder her nach chunftig waerdent daz wir dem erbern geistleichen hern pruder Nida von
Wildungsmauer di czeit maister cze Mauerperig sand Johans orden vnd dem haus da selbs mein rechts aigenhafftez anerstorbens
erib gut daz ich gehabe han dacz dem dyepoltz in harrasser pharr dez vierdhalber schilling metzen waicz ist vnd ain metzen
feuchter mass vnd vierdhalb phunt phennig minner virczigk phennig wiennar muzz han ze chouffen geben mit aller zu
gehoerung vmb hundert phunt vnd vmb achthalbs vnd achtzigk phunt alles wiennar phennig der wir gancz vnd gar
gericht vnd gewert sein an allen vnsern schaden wir schullen auch dez vorgenanten gut ir recht gewer vnd schirm sein
alz dez lants recht ist in oesterreich vnd ob in icht chrieg da von auf erstuend daz schullen wir in aus richten alz wir in
verhaizzen haben Tůt wir dez nicht welicher lay schaden si dez naemen cze Juden oder cze christen den si pey irn treun
an aid vnd vnberecht gesprechen moechten den schullen wir in aus richten an allen irn schaden alz oben verschriben ist
vnd schullen si daz haben dacz vns vnd vnsern treun vnd auf aller vnser hab di wir haben in dem lant cze oesterreich
oder wo wir di haben mit vrchund dez brief den ich obgenanter stephan der Straeuzzer dar vber gib mit meinem
anhangimdem Insigel vnd mit hern Jansen von rietental anhangimdem Insigel vnd mit hern hainreichen dez
velebrunner anhangimdem Insigel di daz zu ainer geczeugnuzze dar an gelege habent in an schaden dar vnder
ich mich vnd mein vorgenantew haussfraw ann vnd alle mein eriben verpinden alles daz stet cze behalten daz
oben verschriben ist daz ist geschehen do man zalt von christes gepurd dreuczehen hundert Jar vnd in dem
siben vnd sibenczigisten Jar dez montag vor sand Joerigen tag