Ich Andre ze den zeiten hern Chvnratz chaplan vergich vnd tvn chvnt allen den die disen brief sehent oder horent
lesen. Daz ich mich des mit meinen trewen verlubt vnd verpunden han gegen h(er)n Weycharten bei den brudern vnd
gegen seinen erben vmb daz havs daz weilent gewesen ist des hvnczhundes lazzer vnd maister hainreiches des golt
smides von Nurnberch gelegen in der chamerstrazze ze wienn. do man alle iar von dient dem egenanten h(er)n Weycharten
vnd seinen erben siben schillinge phennige ze purchrecht. vnd daz er vmb daz selb purchrecht mit rechtem chauf e
malen behabt hat als der brief sait den er dar vber hat also fvrtme daz ist daz ich od(er) mein nachchomen od(er) swer daz
havs nach vns besitzet. vnd in daz selbe purchrecht ze rechten tagen nicht dienten vn(d) raichten. so sullen sew sich dann
furbaz mit vnserm guten willen an alle chlag des egenanten havses wid(er) vnder winden in allen den rechten als d(er)
brief sait do sew ez emalen mit behabt habent. vmb ir versetztes purchrecht. Vnd des ze vrchunde so gib ich in
disen brief versigelt mit meinem Inssigel. vnd mit h(er)n Dietreiches inssigel des pharrer. der diser sache gezevge
ist mit seinem Inssigel vnd ander erber levt genvg den der sache wol chvnt ist Der brief ist geben ze wienn
nach christes geburt als drewzehen hvndert iar. dar nach in dem sechst vnd viertzigistem iar. des gvte(n)s an des
heyligen chrevz tage als ez ervnden wird. :.