Wir heinrich von Rozenberg von konyglicher gewalt von Behmen Hauptman des Furstenthums zu Breslaw Bekennen offentlichen mit disem briefe
das vor vns vnd den Edelen Conraden luckaw hannsen Tscheake heincze schellindorff Nickeln dzalusch von der Nympk hannosen Beyer
Niclasen borg wenczlawen reychel vnd heinczen Jencowitz vnsers gnedigen hern des konyges von Behmen Mannen In gehegtim dinge do der
Ersame hannos Seydlicz vnser hoferichter von vnsern wegin das gerichte sas Ortil vnd recht gebin hat Also als die Schaffere des
Wirdigen Capitels zu Sandte Johannes vnd der Comptor zum heiligenleychnam an eyme vnd ffridrich renhart vnd valentin hannolt
in vormundischaft etwann Nickeln Elke kyndes am andern teyle Ire beyder wissenschafft ynbracht habin noch teylunge der Mannen
von des wasserlowffs wegen czwischen wetkewicz vnd Monchsdorff vnd andern gutern vnd das meyste teyl der geczewgen an eydesstat
bekant habin das das wasser czwischen beyden steynen die do ligen off wetkewicz felt an Monchsdorffer grenicz durch eyn loch gegangin
habe das denne der Hauptman mit den gesworen Mannen offte besehen habin (et)c So sal der vnderste steyn an dem bodem bleyben ligen
vnvorruglichen vnd die Gemeyne zu wetkewicz sullen die andern czwen grosse steyn die off dem vndersten an beyden obern steen von
enander rucken vnd seczen czweier elen weyt vnden vnd oben also das das wasser seynen freyen gang czwischen denselben steynen geng
lichen gehabin mag vnd eyn yclich teyl sullen ire graben fertigen vnd reymen off dem iren mogelichen von rechtes wegin dasselbe
Ortil vnd alles das vorgeschriben steet habin wir stete vnd gancz vnd bestetigen das von konyglicher gewalt von Behmen der wir gebrauchen
mit dem konyglichen Ingesigel der landtlewte des Furstenthums zu Breslaw dasto ist zu Erben vnd sachen das an diesen brieff ist ge
hangin Gebin zu Breslaw an der mittwoch vor Johannis baptiste Nach cristi geburt vierczenhundert vnd Im Sechsundfunffczigsten
Jore do bey sint gewest die Edeln die obingeschriben steen vnd hannos Banykow Canczler des vorbenumpten Furstenthums zu breslaw
der diesen kegenwortigen brieff gehabin hat inbefelhungen