Ich nicolaus hezend brud(er) des ordens sant Johanniß vo(n) J(e)r(usa)l(e)m vnd
Comt(ur) des hawß des liychnaß xpi zu breslaw. bekene mit dye=
sem brife das yn meyner kegenwertikeit do Jorge otto. Schul=
man lorenz bemberg hanz Asman Jacob treth pet(er) politschke
doselbest dyng soßen Gestand(e)n hot vor gehegt(e)m dynge nickel
Jentschke vnd hot ofgereicht. zuhalden vnd zubornen dy lampe
dy do henget yn der kirchen des heylig(e)n liychnas vor dem alter der
muter gotis der lib(e)n marien yn der kirchen des heylig(e)n leychnas.
eynen firdung Jerliches zinses off eyne(m) morgen ackers den her
yn dem genant(e)n dorfe hot. geleg(e)n zwisschen dorotheen Andres
hosemanyne vnd bartusch han Czugeb(e)n alle Jar gleich den selbi=
gen firdung off sant Johannis tag des tewfers wider abezukew=
fen den genant(e)n firdung vor vomff marck hell(er) wene her
das vormag vor sisen zinsen vnd sunderlich den erbgins(e)n
vnschedlich des zu eyne(r) bekentnis habe ich obgenat(er) Comt(ur)
meyn Ingsigel an dysen brif gehang(e)n Gegeb(e)n noch crists ge=
burt vomfzehnhundert Jar am tage des heilig(e)n donati des merter(er)s