Wir Ihan Herr vonn Wartennbergkh Oberster Maister des priorats
im kunigreich Behmen, auf Wartenberg bekhennenn offentlich mit
disem unnserm briefe. Nachdem unns der Erwirdige Herr Michael
Mongener unnser ordens bruder Commentur zu Presslaw, funff
hundert gutter ungerischer gulden, den andern zu unns, unnd
heruorn auf vier Jar dargeligen, derhalben Jagen wir, dem
gemelten Commentur unnd seinen nachkhomenden vor unns unnd
unnser nachkhomenden trewlichenn zu, selche funffhundert ungerische
gulden nach ausganng der nehst folgendenn vier Jare, das ist
heute, widerumb zu gutem danckh zubetzalenn, unnd die Jerlichen
Respons, so er unns zugebenn schuldig, wollenn wir die v. vier
Jar fallenn lassenn, unnd von Im nicht fordernn, Sols auch der
von unns genntzlich quitirt unnd letzedigt sein, unnd ob wir
an der zalung nach ausganng der vier Jar, seumig wurdenn,
so sols gemelter unnser Ordensbruder, die Jerliche Respons
nicht zu gebenn schuldig sein, bisolannge wir oder unnser nach
khomende die funffhundert ungerisch gulden betzalt unnd ver
genuget habenn. Wo sich auch zutruge, das gemelter Comentur
unnser nicht zalungs halben, de kheinen schaden neme, oder
entphinge, das selenn wir Im mit der Hauptsuma zuerlegenn
unnd zubetzalenn schuldig sein, wo wir aber daran seumig be
fundenn, so sol unnd mag gemelter unnser ordens bruder,
sich seines schadenns an unnd auf unnserm ordens guttern
erholenn, dar wider selenn unnd wollenn wir, noch unnser
ordens bruder nicht sein, auch niemandt von unnsert
wegenn thuen sol, ganntz trewlich unnd ungeferlich. Des
zu steter unnd vester haldung habenn wir unnsers priorats
Innsigel mit wissent unnd Rathe unnser bruder an disenn
briefe gedruckht, der Gebenn ist zu Presslaw, den sibenundzwaintzigste
tag des monats februarij, nach Christi geburdt, funfftzehenhundert
unnd Im Achtunddreissigstenn Jare.