Wir Rathmanne der stad Breslaw vonn kuniglicher gewalt vonn Behemenn haltende und vorwesende die haubtz
mannschaft zu Breslaw Bekennenn und thun kund offentlich mit diesem brieff fur ydermeniglich
das fur unns gestandenn ist der Ersame unnd haftige Georgius Hornig unnser Rathfreundt wolgesunnd leibes unnd der synnenn
mit wolbedachtem mute Unnd hat bekhannd unnd außgesagt das ime die Ersamenn unnd namhaftigenn y unnsere stadtkhamerer von we
genn gemeiner stad die funffhundert guldenn hungarisch im golde unnd rechtfertig unnd gewichte vor welche er das gut unnd
dorff Thawerenn im breslischem weichbilde gelegenn vonn den wirdigenn herrenn y Cumpter unnd Comentur zum heiligenn
leichnam allie zu Breslaw im vorsatzung gehabt hat volliglich unnd zu gutem dancke bezalet unnd vorguldenn habenn Und
sagte sie derselbenn gantz quitt frey los unnd ledig Globende sie unnd gemeine stad auff das obberurte gut unnd dorff Thawer
der halben nit anzesprechenn noch zubeunruhigenn Weder geistlich weltlich in kheine weise Dasselbige Bekent
nis lossagung unnd alles das do vorgeschribenn stett habenn wir stete unnd ganntz Unnd bestetigenn das vonn kuniglicher gewalt
vonn Behemenn der wir gebrauchchenn mit dem kuniglichenn Inngesiegl der landtleute des furstenthumbs zu Breslaw das do
ist zu Erbenn unnd zu sachenn unnd ann diesenn gegennwertigenn brieff gehangenn Gebenn zu Breslaw am Neundenn tage
des monats martij Nach Christi unnsers herrenn geburt funfftzehenhundert unnd im viertzigstenn Iar Dabei seinnd gewest die
Edlenn heinrich kreischelwitz hanns sedlitz George Rymbab hanns sommerfeld Eysack genanndt niclas Uthmann Ambro
sius Ienkwitz Mathias langnick Unnd hanns untermunde unnsers gnedigenn herren des kuniges vonn Behemenn mann