In gotes Namen amen Wir Ruprecht wenczlaw vnd ludwig von gotes gnadin gebrude In slesien herczoge h(er)rn czu lobin vnd mynsterb(er)g (et)c(etera) Bekennen vnd thun kunth wissent
lichen mit desem brieffe allen den dy en sehin adir horen lesin das vor vns komen ist vnser lieber getruwer heintze tyle von wegin Margarethan seyner elichin hawsfrawin
dy etzwen chryst beyerynne tochtir gewest ist von wegin Nencker beyers vnd Eulein seyner swestir dy do etzwen Merten beyers kinder gewest seint vnd hat vor
vns bracht vnd geweisit eynen brieff obir dy helffte des gutis Brunczharczhe genant In vnsem mynsterb(er)gischin weichbilde gelegin Mit eyme anhangendin Ingesegil
der hochgebornen furstynne vnd frawen frawen Agnisin etzwen furstynne In slesien frawen czu sweydnytz vnd czum Jawor dy der got gnade
vorsegilt vnd hat vns demutiglichen Mit seynen frundin gebethin das wir den obgenantyn Margarethan Nencker beyern vnd Eulein seyner swestir Noch des furst
lichin brieffe lawth czu erem guthe Nemelichin czu der helfftin der grunen harczhe vnsers mynsterb(er)gischin weichbild komen weldin lossen vnd en das bestetigin vnd
befestin welch brieff von worthe czu worthe her noch volget vnd lawth also Wir Agnes von gotes gnadin herczogynne In slesien frawe von furstenb(er)g czu der sweyd
nitz vnd czu dem Jawor Bekennen wissentlichin mit desem brieffe Allen den dy en sehen adir horen lesin das vor vns komen seint vnser liebin getruwen frederich vnd
henniche gebrude etzwen h(er)n seuerins sone vom bebirstein beide von eren wegin vnd auch der andir erer brudir wegin dy do noch vnmundig seint bei gutir vor
numpfft vnd gesuntem leibe vnd habin mit wolbedochtim muthe vnd mit rathe erer frunde recht vnd redelichin vorkawfft vnsem liebin getruwen petirschin beyer
vnd petir seyme sone burg(er) czu bresslaw allis das sy an erbe vnd an guthe gehabth habin In dem dorffe wenigcharczhe des weichbildis czu mynsterb(er)g das allis
ein ergen ist Is seie woran is seie nicht vszgenomen Mit allen seynen czugehorungin vnd Mit allen freyheitin rechtin Nuczin genissin fruchtberkeitin vnd
herrschefftin vnd sunderlichin mit obirstin vnd nydirstin gerichtin vnd In alle der mosse als sy das selbir gehabth vnd besessin habin vnd als von aldir gelegin
hat vnd leith vornemelichin auch das das kirchlehn halb do selbist dem selbigin guthe sal volgin vnd den obgenantyn petirschin beyern petir seyme sone vnd von allen
eren erbin vnd rechtin nochkomendin czu eynem rechtin eygm Ewiglichin gemachsam vnd vngehind(er)t czu habin czu besitzin czu vorkawffin czu vorsetzin czu
vorwandilin vnd an eren nucz als en das allirfuglichste wirt sein czu wendin Czu dem selbin kawffe habin wir auch vnsu furstlichin willen vnd gunst gegebin
vnd habin en auch von vnser furstlichin macht bestetigth In aller der mosse als obin geschrebin stet vnd bestetigin auch mit krafft ditz brieffs vorsegilt czu eynem
vrkund mit vnsem anhangendin Ingesegil Gebin czu der sweidenitz Noch crists geburt dreuczenhund(er)t Jar do noch In dem funff vnd sebenczigistin Jare an dem
dinstag noch senthe Mertins tage des heyligin bischoffs vnser liebin getruwen der Edele her thimo von culditz h(er)n benisch schoff hennich walditz Gunthir von ronaw
Jost schoff hennich von rosen Nickel von falkinhain vnd hanns von slewnitz vnser hoffeschreiber dem deser brieff wart befolin vnd andir vnser man vil
Das habin wir von vnser furstlichin gnadin des vorgenantyn heintzin tyle vnd seyner frunde dinst dy sy vns gethon habin vnd noch thun werdin vnd kwnnyn ge
berthe betracht vnd angeseyhn vnd habin das vorgenanthe halbe guth brunczharczhe vnsers mynsterb(er)gischin weichbilds den obgenantyn Margarethan dy etzwen Merten
beyerynne eliche tochtir gewest ist dy helffte des obgenantyn halbin gut brunczharczhe Nencker beyer vnd eulein seyner swestir etzwen Merten beyers kinder dy andir
helffte des halbin gut brunczharczhe vnd den obgenantyn furstlichin brieff In allen seynen punctin stuckin vnd artickiln vnd allis das her ynne hat vnd beheltith
Bestetiguth vnd befestint bestetigin vnd befestin In krafft ditz brieffs en eren erbin vnd rechtin nochkomelingin czu eynem rechtin eygm erblichin czu habin czu
besitzin czu vorwechsylin czu vorkawffin gantz adir ein teil In aller mosse als obinknaut ist vnd noch des aldin brieffs lawth vnd an eren frumen vnd nucz czu
wendin als en das allirfuglichste sein wirt Czu vrkunde rechtir wissin vnd ewig bestetug habin wir desin brieff heissin vorsegilt werdin Mit vnsem anhangendin
Ingesegil der gebin ist czu mynsterb(er)g Noch crists geburt virczenhund(er)t do noch In dem czweinczigistin Jare an dem montag noch des heiligin crewczes tag
als is Irhabin ist do bei seint gewest vnser liebin getruwen Thamo von wostirb(er)g vnser hoffemeist(er) Jorge falkinhayn vnser marschalk Cunrad von ma
naw vnser hemptman czu mynsterb(er)g hanns vom Jmmand hennich bischoffheim benisch stebil Jarye belhar Eigennud vom swepn vnd andreas holatsch
vnser schriber dem deser brieff bepholin wart