Ich peter der Richter ze den zeiten vnd di gemain chnappen vnd purger von d(er) Stat ze furstenveld. Veriehen an disem prief vnd tun
chunt allen den di nv sint oder her nach chunftich Werden daz wir vns verrichtet haben mit gemainem rat mit den erbern herren
mit den brudern sand. Johans. Ordens. vmb di chappeln pei dem Spital da zv furstenveld daz si di schuln inne haben vnd
versehen ewichleichen mit gots dienst ain tach od(er) zwen inder Wochen als ez dem pharrer vugt vnd mit auz genomer
red daz di prud(er) datz furstenveld durch di chappeln nicht mer dan drei prister haben schullen als ez e mit gevonhait
her chomen ist. vnd swen daz ist daz man gots dienst zv d(er) chappeln hat ob man dan ainer messe dester min da zv der
pharre hat des schuln di prud(er) von vns an wort vnd an alle red peleiben. vnd waz vnderbuge d(er) chappeln von d(er) pharre
mach geschehen ez sei von messegewande von kelchin oder von wo daz sei daz ist vnser aller gut wille. vnd als vil
mer ist daz indem Spital daz wol geschehen mach ain prist(er) ist od(er) zwen di da phleger vnd chamener sint di schullen mit der
chappeln an d(er) prud(er) willen nicht zetun haben. vnd swaz daz ist daz dem alter wirt daz ist der pruder vnd habent daz mit
nimen zetailen. Swaz aver zv der chappeln oder zv dem Spital gesament od(er) geschat wirt daz habent si auch mit nimen
zetailen. Di prud(er) habent auch mit dem Spital vnd mit den sichen noch mit ir gut niht zeschaffen den gut alain so si
des got ermant. Daz dise red. stet vnd vnzerbrochen peleib dar vmb geb wir den vor genanten prud(er)n disen prif zve
ainem waren vrekund ver sigelt mit der Stat insigal ze furstenveld. vnd sint des gezeuch h(er) perchtolt. der iunge druch
sez von Emberwerch d(er) vnser hauptman was zv den zeiten. vlreich. d(er) chaphenstain. Ruger. d(er) hevelaer. hertel. d(er) flad(er)perg.
Ditreich. von gretz. Chunrat. d(er) velnpech. perchtold. d(er) stege. vnd and(er) piderber leute genuch. Diser prif ist gegeben nach
christes geburt vber Tausent iar vnd dreihundert iar in dem sibenten iar d(er) nach an dem andern suntage in d(er)
vasten. Datz furstenveld in der pruder haus