Ich Alheit hern Vlreiches widib von Chapphenstain dem got genedig sey
mit sampt mein erben sun vnd tocht(er) Jgehe(n) vnd tu(e)n chunt offenleich an diesem prieff
allen den die in sehent oder ho(e)rent lesen die nu(e) lebent oder hernach chu(e)nftig sint daz
wir mit woll vordachtem mu(e)t vnd mit vnser pester wi(n)t ra(e)t zu(e) der zeyt do
wir ezz woll getu(e)n mochten haben gegeben dem hau(s)s zu(e) Fu(e)rstenvelt vnd den pru(e)dern
sand Johans orden vnsers rechten aygent drey hoffstet die da gelegen sint in dem
dorff zu(e) Reut mit all dem recht als wir ez gehabt haben zu(e) veld vnd zu(e) dorff gestift
vnd vngestift versu(e)cht vnd vnversu(e)cht vnd drey emmer pergrechtes vnd haben
in daz selb gu(e)t gegeben genetzleich durch meins lieben wirtes sell will hern Vlreiches
von Chapphenstain vnd durch aller vnser vodern sell willen also mit ausgenu(e)mener
red daz sie vns alle jar des nechsten montagz nach sand Jacobs tag den jartag schuln
pegen des nachtes mit vigill(e) des morgens a(y)n tegleich prister mit a(y)ner sellmess
vnd geben auch ten e(y)nez der auf den vorgenante(n) hoffsteten leyt des zewen vnd gu(e)ten
e(y)n phennig sint den pru(e)dern daz man in des tagz dynen schol als man in den jartag
peget aber die wey(n)t die auf ten selben hoffsteten ligen vnd die drey emmer perg
rechtes die geb wir ledigchleichen dem hau(s)s daz die red stet vnd vnzu(e)prochen pleyb
dar vmb so gib Jch vorgenante Alheit von Chapphenstain diesen prieff zu(e) a(y)m vrchu(n)t
der warhait pestetigt vnd pesest mit meim anhangendem Jnsigel vnd mit meins
eltern sun Jnsigel Vlreiches des Chapphenstainer vnd mit meins a(y)dem Jnsigel O(e)ten
des Chellermans die zeug diser sach ist Ru(e)del von pu(e)hel Walther d(er) prier p(e)tr d(er)
Chapphenstain p(e)tr an dem Margt Fridel der kung(er) H(a)chlo der gu(e)tmans(er) O(e)t der
vischker vnd ander vrum(er) leut genu(e)g ten die sach woll chunt ist vnd der warhait
gesten der prieff ist gegeben nach chrystes gepu(e)rt drevzchen hu(n)dert jar dar
nach in dem drey vnd dreyssigistem jar an sand Agnes tag