Ich bruder matt heser sannd Iohanns orden von Ierusalem Comendior ze furstenueld Bekenn mit dem offenbrief vnd tun kund das ich mit gutn willen vnd wolbedachten mut zu der zeit do
ich ez mit recht wolgetun mocht vnd besunder mit gunst vnd willen vnd auch erlaubnuss meins obristen mit sinem brief den ich darub von Im hab vnd auch in gegenburtikait vnd mit willn
des Ersamen herren hern hannsen dye zeit statthalter vnsers obristen vnd Comendiore ze melling durch meiner sel meiner vordern vnd aller gelaubigen sel hail willn vnd besunder ze lob vnd
eer dem Erwirdigen Gotzhaws sannd Iohanns pfarrkirchen zu furstenueld in geantburt vnd gegebn hab dem Edln vesten wolfgang stadler dye zeit pfleger zu furstenueld fridreichen vnczder
Stattrichter daselbs vlreichen waign vnd philippen dem kussel burger daselbs vnd hannsen dem Cechmaister des benant gotzhaws von Erst sechtzhundert pfunt vnd funf vnd sibentzik pfunt vnd zway
hundert gulden In gold vnd zwaintzik pfunt pfing hat herr hainreich pfarr zu Altenmarkt Inn auf dye obgenant sum gelts vnd In gegenburtikait der obgenant siben lewt hab ich ain Erber wol
bedachts gescheft getan vnd tu auch wissentleich In kraft des briefs Item von Erst so schaf ich dreissig pfunt pfing dauon man mir begen sol den Ersten den sibndn vnd den dreissigstn vnd sol mir auch
dauon singen vnd lesen den Eest hinc auf den dreissigstn all tag nach der frumess ain vigily mit newn leczen vnd mit den laudes vnd ain gesungens slambt vnd all nacht nach der vesper ain gesungens
placebo vnd vber das grab gegangen vnd man sol mir auch den salt dauon ordnleich lesen vnd sol auch dauon kauffen ain ganczes tuch armen lewtn man sol auch dauon kauffen ain knechtisch tuch vnd wein
vnd Brot das sol man armen lewtn gebn vnd austailn auch sol man dauon gebn vettroden vnd schuler drey pfing vnd sol auch gebn fust zehen armen lewtn das opfer vnd das sol alls albeig beschechen
zu den benant drein tagen Item so schaf ich funfczig pfunt pfing zu hilf vnd stewr das man disser frawen absetzn in der benant pfarrkirchn gewelb so schaff ich zwaintzik pfunt pfing darumb
man kauffen sol ain pfunt ewig schiltling pfing gelts vnd dye sol man gebn den schulern dye mit gotzleichnam singend geent wann man tzu den siechn get so schaf ich In dye kamer zech
sechs pfunt pfing dauon man mir Iarleich ain Iartag sol begen an dem tag so ich gestorben bin so schaff ich drewczehnhalb pfunt pfing vmb vnsers mess so schaff ich In dye obre bruderschaft
fur zewg so sy mir begen werdn achthalbs pfunt pfing so sol der antlether ausrichtn In dye nider bruderschaft siben pfunt pfing dye er do mir Inne hat nach Innhaltung seins briefs Item so
schaf ich vnserm prior dem von aichelpach hundert guldn In muns ze sechs schilling vnd zehen pfing fur ain gulden Item so schaff ich dem obgenant hern hannsen statthalter zwaintzik
pfunt pfing Item so schaf ich dem Cechmaister der dye selb zeit Cechmaister ist fur sein mu vnd arbait drew pfunt pfing so schaff ich den armen In das klost funf pfunt pfing auch zu ains
Iartag Item so schaff ich steffan meim keller funfundzwaintzik pfunt pfing Item so schaff ich margaretn meim kochin funf pfunt pfing so schaff ich meim knecht de wolfgang funf pfunt
pfing so schaff ich meinem pawknecht dem Cristan zwelf schillig pfing so schaff ich meim knecht dem Gilgn zwelf schilling pfing so schaff ich das gut das vber das obgenant mein ge
schaft vbrig ist das man darub kauf gult so uil man mag vnd dauon den stift ain ewige mess In der obgenant pfarrkirchen auf sannd Barbln altar mit ainem Caplan der vnsers ordens sey
den selbn Caplan sol der Comendior presentirn vnd der prior des ordns In Iohann osterreichs sol In Confirmirn wern abr dye In der Comendy darInn vber das nicht tun welln so sulln dye
burger der Richter vnd rat der stat zu furstenueld ainen Caplan presentirn vnd den sol der pischof zu salzburg dann darzu Confirmirn Es sol auch der benant Caplan mit dem benantem
Comendior daselbs essen vnd trinken vnd bey Im In dem haws sein wonung habn als andr sein brudr darub so sol man dem Comendior desselben benantn haws Iarleich gebn vnd raichen
zwelf pfunt pfing vnd dem Caplan derselbn mess sol man dauon gebn Iarleich auch zwelf pfunt pfing was abr mer vbrigs gelt da das sol man anlegn zu andr notturft der benantn
mess Es sol auch dye gult vnd nutz der benant stiftung der mess so dann kauf wirt hin fur Innhabn vnd dye stiftung der mess werdn In der benant Comendior des haws zu furstenueld der selb
Comendior sol dem Richter vnd rat zu furstenueld ainen gegenbrief darub gebn Es sol auch der benant Comendior dye holdn vnd gut der obgenant stift In kainer weg noch weis beswern nur
mit stewr noch mit robot an merckhleich gross notturft vnd an des fursten willn da mit dye stift der mess wol fursecht wird vnd fur sich gee das obgenant geschaft sulln dye sibn lewt nach meim
abganck ausrichtn vnd an meim stat volfuren als ich Inen des mit fleiss erbetn hab vnd das solich mein geschaft furbas stet vnd vnzerbrochn beleib vnd In darInne kain Irrung furbas
auf erste Bitt ich lauterleich durch gots willn zu ains gewissn sichern meins geschefts den durchleuchtign hochgeborn furstn Herczog fridreichn den Iungn Herczog ze Osterreich
ze Inemen genadign herrn als seinen anwalt das sy dye obgenant erbn lewt bey meim geschaft alls rechtchleichn haltn vnd schirmen da mit solichs mein geschaft volbracht wird vnd
In nicht saumig noch Irrig von yemant widr varn lassen vnd des zu ainem warn vrkund vnd ewige bestatung gib ich den brief besigltn mit meim aign anhangundn Insigl vnd
zu bessr sicherhait vnd gezeugnuss hab ich fleissichleich gebetn dye Edln vesten fridreichn vnczder vnd Iohann den furleub das dye baid Ir Insigl zu dem meim an den brief
gehangen habn In vnd Iren Erbn an schadn der brief ist gebn nach Cristi geburdt Tausent vierhundert In dem acht vnd dreissigstn Iar am sambztag nach dem heilign pfingsttag