Ich Gotfrid der Wiersinch vnd ich Jent sein Hausfrowe vnd alle vnser erben Wir vergehen vn(d)
tuen chunt allen den disen brief sehent oder horent lesen die nv lebent oder her noch chunftich sint. daz
wir mit verdahten muet vn(d) tze der tzeit do wir ez wol getuen mochten ver chauft haben die zehent
die wir gehabet haben enhalbe twenawe tze Purbach vnd vnd tze chvblitze mit vnserm rehten lehen her
ren hint(er) an hertzogen in Osterreich mit alle dem recht vnd nutze als wir sy in lehens gewer her
pracht haben ez sei chlain oder groz versuecht oder vnversuecht tze velde oder tze wise vnd haben
sie gegeben vnserme lieben frevnt hern Gotfriden dem gebeshen vnd allen sein erben vmb funfzig
phunt phennig wienner munizze der er vns gewert hat gantzleich vnd gvt. Ez sol auch der vor
genant her Gotfride vnd alle sein erben mit den vor genanten tzehten allen ir(e)n frvm schaffen an
allen widerfal mit ver chuffen mit ver setz(e)n vnd geben wem si wellen. Wir sein auch den vor
genanten tzehent ir reht(er) schirme vnd gever fuer alle ansprach als lehens reht vn(d) lants
reht ist in Osterreich. stossen si dar vber dehein schaden mit reht an den vor genanten tzehten den
schvlle wir in ablegen gantzleich vnd gvt. Gienge in dar ein dwer reht ab daz schullen si haben
auf vns vnd auf alle dem guet vnd wir haben in dem lande tze Osterreich. Daz diser redt
stet vnd vntzebrochen beleibe daz lob wir in tze laisten mit vnsern trewn. Vnd dar vber
gib ich vor genanter Gotfride der Wiersinch in disen offen brief tzu einem gezeug vnd tzu ei
nem vrchvnde diser sache versigelten mit mein vnsigel. Der redt vnd des choufes sint ouch
gezeug her vlrich der tozenperch mit seinem vnsigel. vnd perchtolt der Eberspvrger mit
seinem vnsigel. Der brief ist gegeben tze chvnchperen do man tzalt von christes geburde drev
tzehen hvndert iar dar nach in dem drew vnd dreissigsten iar an sand Nyclos tag.