Ich Alber von Liechtenekke vergich und tun chunt allen den die disen brief lesent oder horent lesen die nu lebent und hernach chunftich
sint daz ich mit meiner erben guten willen und gunst umb verdacht ein mut zu der zeit do ich iz wol getun mochte recht und red
leich verchauft und geben han vor chaefter not grozzer gult die ich gelten solt hincz den Juden meins rechten Aygens funf
phunt wienner phenninge geltes die gelegen sint ze Leubs auf gestiftem gut und auf uberlent mit alle dem nucz und reht
als ich die selben gult in Aygens gewer her pracht han umb funfczich phunt wienner phenninge der ich gar und gancz
leich gewert bin meinem vetern hern Chunraden von Liechtenekke und allen seinen erben furbaz ledichleich und vreileich
ze haben und allen irn frumen da mit ze schaffen verchaufen versetzen und geben swem si wellen an allen irrsal und bin
auch ich Alber von Liechtenekke und mein erben unuerchaidenleich der vorgenanten gult meins vetern hern Chunrat
von Liechtenekke und seiner erben recht gewern und schirm fur alle anspach als Aygens recht ist und des Landes
recht ze Osterreich swer aber daz si mit recht an der selben gult dehainen chriege oder ansprach gewunnen swer si
des schaden nement daz si lei irn trewen gesagen mugen den sol ich in allen ab legen und wider chern an alle ir mue
und an allen irn schaden und stet auch si den selben schaden haben auf mir und auf allem meinem gut daz ich han in
dem Lande ze Osterreich ich sei lebentich odert tode und daz diser chauf furbaz also stete und unzerbrochen
beleibe dar umb so gib ich in disen brief zu einem warn urchunde und zu einer ewigen vestnunge diser sach ver
sigilt mit meinem Insigil und mit der erbern herren Insigiln hern Hansen von Chunringen Obrister schench in Oster
reich hern Hadmars des hrueschen von Trautmanstorf hern Eberharts hern Hainreichs der pruder von Walse
hauptleut ze Drosendorf hern Otten von Walse die alle diser sache gezeuge sint mit irn Insigiln diser
brief ist geben ze Wienne nach Christes gepurt dreuczehen hundert iar dar nach in dem ains und vierczigste
Iar an sant Dorotheen tage