Ich Hardegen Herr Jorgen sun von Gogenstorff und all mein erben wir chunden offen
leich an dem prief und tuen chunt allen den die in sechent od(er) horent lesen die nu
lebent od(er) hernach chunftig wident daz wir mit wol v(er)dachtem mut gestetigt habn
unser rechten aigens ain hof der do leit in chulber pharr und haist ain chuen=
hercz hof und der mich und meinen geswistreid anerstorben ist von uns(er)m vater
saligen den got gnad chreistansen dem stigler und wernh(er)n Jorgen seim haussfrawen
und ir paid(er) erben und den sew auch ge chauft habent von chuenraten dem s(er)t(er)
und seim erben um ains und dreizzich phunt wienn(er) phening als ir chauf prief
sait den egenanten hof schullen sew auch haben von uns ze allen den rechten als
hernach geschriben stet und also beschaidenleich daz er ir freys purkrecht schol
sein und uns do von dienen schullen an sand michelo tag all iar ain phunt phening
wienn(er) munezz und nymer des schullen auch frey und ledig sein vor allem un=
gelt an(er) daz sew schullen geben fumfzechn phening ze anlait und fumfzechn phening
ze ablait und nymer Jch schol auch der vorgenant stigler und sein erben mit dem
egenanten hof allen irn frum schaffen ze v(er)chauffen und ze v(er)seczen wem sew well(en)
lewt wem sew den uber den egenanten hof gebent ze v(er)chauffen oder ze v(er)seczen
der schol in haben mit alle den rechten als in chreistan der stigler von uns hot
was in der uber an den egenanten hof ab get mit recht daz schullen sew habn
auf uns unschadenleich und auf aller d(er) hab dev wir haben in dem land ze
ostreich wir sein lemptig oder tod daz die red stet und ungebrochn peleib dar
gib ich vorgenant(er) hardegen in den offen prief v(er)sigelt mit meim anhangendem in=
sigel der sach ist auch gezeug alber der leompart und hainreich d(er) leompart sein
prued(er) mit irn anhangenden Jnsigeln in an schaden der prief ist geben do man
zalt von christes gepurd drevzehen hund(er)t iar dar nach in dem sechss und
sechzgissten iar an sand philipps und an sand Jacobs tag