Ich Alb(er) d(er) Zendel und ich Elspet sein hausfraw und uns(er) paid(er) Erben und ich Ruda d(er) Ochsner und ich Wenczel
sein hausfraw und uns(er) paider Erben wir verjehen offenlich mit dem brief und tůn chunt alle den die in sehent
od(er) horent lesen die nu lebet od(er) hernach chunftig w(er)det daz wir mit wolbedachte(m) muet und mit gutlichem
wille all uns(er) Erben und nach rat uns(er) pestn frewnt und zu d(er) zeit do wir iz wol getun mochten recht und
redlich v(er)chauft habn durch recht(er) chauf(s) nott wille uns(er) rechten Aygens zwainczig phennig Gelt linczner
munzz die gelegn sind Auf zwain Saelhengn An dem Hoff ze Volchmarstorff in O(ber)nsulcz pharr und
Newn phennig Gelt gelegn Auf Abalend do selbs und die man alle iarlich dient An sand Michels
tag mit alln de(n) rehten und nuczen und darzue gehoirt und als wir iz in recht(er) Aygens Gwer herpracht
habn Also hab wir iz Allz v(er)chauft dem leenharten de(m) leedler von O(e)d und sein(en) Erben umb Zechen
schilling phennig linczner munzz d(er) wir gar und genczlich v(er)richt und geit sein ze rechten tegn An
alln schade(n) dew schulle Auch mit de(m) vorgenant(en) Guet alle rewt frum domit schaffe(n) wie in daz all(er)pest
fuegt ze v(er)seczn und ze v(er)chauf(e)n und gebn dem selb leedler mit uns(er)m guetleichem wille an alle chrieg
und ierrsal wir sein Auch des vorgenant(en) Guez reht(er) Schirm und Gwer fuer alle Ansprach als
Aygens recht ist und des landes gewonhait in Osterreich Ist au(ch) daz in an de(m) vorgenant(en) guet darIn
iht Abgieng mit recht suelichn schade(n) sew des niemen er od(er) sein Erben de(n) iew(er) aincz pey seine(n) trewn
gespreche mocht ungefwarn de(n) selbn schade(n) gesa(m)pt de(m) hawptguet schull wir in gancz und gar Ablegn
und wid(er)kern und schulle sew daz habn Auf uns und uns(er)n Erben unschadenlich und Auf all(er) der hab
die wir habn oder noch gewinne(n) in de(m) land ze Osterreich od(er) wa wir iz habn iz sey Aygen leehn phant
recht od(er) unruerend und darIn p(er)fome(n) an chlag an furbat und an allez recht mit uns(er)m guet
lewte wille wir sein lemptig oder tod daz die red und der chawff stet und unzeproche(n) beleib
Dar ub(er) do gib ich vorgenant(er) Alb(er) der zendel und ich Ruda d(er) Ochsner in den offen priff v(er)sigelt
mit unser paid(er) Anhangnden Insgigeln der Geug sind auch Georig Hainreich d(er) lening(er) und
lucas der zihler mit iren Anhangnden Insgigeln in An schade(n) der briff ist gebn noch Christes gepurd
drewczehnhund(er)t Iar darnach in de(m) Sibenczigistem Iar des suntags in d(er) vier tagn in d(er) vasten