Wir Graf friderich von ortenberch mit sampt vnsern chinden Graf
hainrichen Graf hermen Graf otten Graf albrechten vnd mit allen
vnsern nachchomen vergehen an dysem briue vnd tůn chunt allen den die
in an sehent oder horent lesen daz wir gestanden sein von dem chriege
den wir gehabt haben Iegen pruder meinharten dem Comendewre von
sant piter vnd ze hailenchrewz dez howsez der da Commendewr waz
vmb drei hůben ze pletschmach die wir durch seine liebe im ledich
haben lazen ewichlich ze besizzen mit allem dem recht vnd daz zv
gehort vnd ist daz geschehen mit vnser chinde hant vnd mit ir gůtli
chem willen vnd daz daz red also beleib vnzerbrochen dar vber geb
wir im dysen brief besigelt mit vnsem Ingesigel vnd mit allen den
gezawgen als sy hie stant mit namen der gehiben sint gezawgen
her Iacob d(er) waerie von zedmenstorf h(er) hermen der zewnnaer
her hainrich vlrich der geslaeht hohel zfidel d(er) schreiber vnd and(er)
biderbe lewte der brief ist geben do von christes gepůrte waren
tawsent Iar zwaihundert Iar in dem acht vnd newnzigistem Iare
dez svntages ze weihnaechten