Fabiann stobner gesaczter Richter Jnnauus der Stad polipcz vnd wir gesworn
scheppen Simon rauczbach stencz breingk Cristoff langener michel seidel paul
austt endres loffsicz vnd gregor winderle bekennen das vor vns Jngehegtem
dinge Heinricz Horke Bekante das er recht vnd redelich eine halbe margk
Jerlicher czinses vff eime widerkaufft vff sein erbschicke czwisschen paul well
vnnd Hanns schonwelders gelegen den wirdigen Hern der creuczheffe allhir
czum gotsprot Jn der prudenna vorkaufft hette vnnd globit gemelte(n)
Hern sulchen czinns auff Joannis Bap(tis)te nehstkomende vber ein Jar an
czuheben erlich czugebenn Also furbas alle Jar Jerlich vnnd ab das
nicht geschehe so sol der richter die czeit gemelte Hern ader nachkomeling
czu gemeltes Horken erbschicke pfandes gnugsam greiffen lassen die
pfannd vorsetzen ader vorkauffen vor den vorsessenn czinns sam alle recht
ane vffbitunge deslich domit begangen weren Vnnd wen Heinricz
Horke ader die sein sulchen czinns widerkauffen wellen das sollen vnd
mugen se thun vmb funff margken ganghafftiger muncze mit
nachreicunge vorsessener czinnse nach quartalia czeil erlauffen
hat czur vrkunt wordenn Horke Beseilt denn brieff der gegebe(n)
ist Mitwoch nach dem Sontage Exaudi Nach cristi geburt
Tausent funffhundert darnach Jm Sechczehenden Jare(n)