Ich hanns Beyer Erbrichter Inn der Statnamen zw Lewenbergk vnndt wire nachgeschriebene Caspar Rotte
Andres Sommer Caspar somer Merten zindler Grege weynolt Merten Bottner vnndt grege weynolt Be
schworne Scheppen dis Jars Bekennen mit dissem briue das vor vnns Jnn gehegtem dinge hans kessner
anderthalbe margk geldes Jerlicher zinsse vff seyn hauß zw nechste hanns tschartnery Jnn der Lamba
nischen gasse gelegen vnndt vff allen seynen guttern farende ader vnfarende Jm Statgerichte gelegen dem
wirdigen herrn Johanni Betzoltzen vnszrem Comptor vnndt nachkomenden zw dem Manuale des pre
digstules bekant desselben zinsse globt er anderthalbe mrk mitenand(er) vff Martini nechstkunfftigk
zwgeben vnndt alsso furbas mehr alle Jar Jerlichen vff gemelten zins tagk zwgeben vnndt zwbezalen
Ob das nicht geschege so sal em der Erbrichter pfander helffen zw hans kessner hauß vnndt zw allen
synen guttern farende ader vnfarende Jm Statgerichte erfunden wie recht ist, dieselben pfant sie
zw handt vor den vorfessnen zinsse vorkeuffen ader versetzen sollen vnndt mugen sam alle recht daruber
ergangen wern, Auch wenne hans kessner seyne erben vnndt nechsten den zinß widerabkeuffen
wollen das sollen vnndt mugen sie thuen mit zwantzigk gutten vngerischen gulden vnschedlich
vorfessner zinß Nach quattuortempor zal iclauffen das sal ehr gemelter herr Comptor die zeyt
wesende von wegen des predigstules hans kessner seynen erben vnndt nechsten wolgonnende vnndt
guttlich gestatten Beschehen vnndt gegeben donnerstag vor viti vnndt Modesti Nach Christi ge
Burt Jm funfftzehenhunderten vnndt darnach Jm Neun vnndt zwentzigsten Jare