Wyr hussche von swerticz meyster sente Johannis orden von Jerusalem zu Behemen Polen Meerer Morau(e)n zc(etera) bekenne(n)
offinlich in desim kegenwertigin brife allin den dy en sehen horin adir lesin kegenwertig(e)n vnde zu komftigin daz wir durch
gotis nottis willin der vnsin egenant(e)n ordin vnde sundirlichin den hawse zum B(r)ig(e) vnde sal ehesten als got wil also
wir schuldic seyn zu tuen vnde vor zu seyn dem egenant(e)n vnsim ordin mit sinen bestin gunstin vnde getruwit dorume
mit rote vnsir eldistin dy wir bereyt zu der geczeyt hattin dy vns daz gerotin habin So habe wir irlobit vnsim libin yn
gote Brudir Niclos stengil Comptir czum Brige vnde dem ganczin Convent do selbis vor kewfin czwu m(a)r(c)k Jerlichis
czinsis vm cwenczic m(a)r(c)k prageschir gro(ss)in polnischir czal dy en bereyt beczalt sint dy vorgenant(e)n czwu m(a)r(c)k czinsis
vorbinde wir vns alle vnsir noch komelinge vnsim Comptir czum Brige vnde dem ganczin Convent do selbis der iczunt ist ad(ir)
yn czeitin zu komftig wirt zu gebin vnde zu gebin Nu uf den nestin sente michils tag eyne m(a)r(c)k vnde dornoch uf den nestin
sente walpurg tag ouch eyne m(a)r(c)k vnde vorbas alle ior zu gebin uf dy egenant(e)n tage der irbarn togentlichin vrawen
Margarethin gockerynne Burgerinne czum Brige czu erin leyp tagin vnde ab dy egenant(e)n armen ir czinse nicht gefelin
uf dy tage als vorgeschrebin ist ists als daz geschege vnde nicht mit ir gunst geschehin worde Alzu ste vorbinde wir
den Comptir vnde dy Brudir czum Brige eyne busse zu gebin drey gro(ss)in vm iczlichis hawse gebrechin vnsim
wezchose czum Brige vnde wen daz geschiht von gotis vorhengmisse daz dy togentliche vrawe Margaretha
vorbenum(e)n salike sterbin vnde abe scheyden von dirre werlde So sillin dy czwu m(a)r(c)k czinsis nietz abe sterbin vnde
dy eyne m(a)r(c)k sal gefallin an daz haws czum Brige vnde dy andir m(a)r(c)k sal gefallin an dy Brudir czu ir p(re)benda
iren czu eyne ewigin gedechtnisse vnde zelgerethe vnde daz man vm dy eyne m(a)r(c)k czinsis der vorgenant(e)n
irbarn togentlichin vrawen Margarethan gockerynne vnde erin nestin vrundin alle ior er Jorgetzeyt bege sal
Jo der p(er)sonen eyne vigilie mit sechs lecczin vnde an dem andirn tage mit der messe nu(n) er ten mole der obgenant(e)n
Margarethan gockerynne vnde dornoch Niclos schultis der er elichir man gewest ist vnde Margarethan dy ir mutir
gewest ist vnde Niclos reyman der ir vatir gewest ist vnde Johannes steynchen der ouch ir elichir man gewest ist
vnde daz man io der vorgenant(e)n Margarethan gockerynne ir Jorgetzeyt bege sal mit sechs lecczin eyne vigilie vnde
den vorgenant(e)n p(er)sonen cwen mit enander vnde abir cwen mit enander eyne vigilie mit sechs lecczin vnde an
dem andirn tage mit der messe sundirlichin czu eyme ewigin zelgerethe vnde durch der genodin willin dy dy irbar
togentliche vrawe Margaretha gockerynne czu vnsim orden gehat hot So tun wir ir dy genode wedir vnde ne
men se yn vnsir Brudirschaft vnde mach(e)n se teylhaftig alle der gutin werke dy geschehin als weyt als vnsir orden ist
Beyde desehallin des meris vnde ouch Jenhallin des meris diz se bestinde sal seyn diz wir hussche seyn geneme von
dem almechtin gote Des czu eyme bekentnisse vnde czu eyner bestetigunge so habe wir hussche von swerticz
Meyster sente Johannis orden vnsir Jngesegil gehangin an desin brif vnde ist gegebin noch gebirt dreyczehin
hundirt ior vnde dornoch yn dem achte vnde nawnczigistim iore