Ich Borvth von Stacho Comptir zcu Tyncze Bekenne offentlich in disem briue alle den di en
sehen horen adir lesen daz mit myner gunst vnd lobe franczko Schultheis zcu pyloho hat mit
wolbedachtem mute mit wissen vnd willen syner frawen Margarethan vnd syner kynder vorkouft
recht vnd redlich eyne marg jerliches zinses vff alle syme gute daz her hat adir ymmer gewynnet
zcu pyloho der pyctanczien vnd dem pyctanczien meister der do iszunt ist adir her noch zukunftig
wirt vor czen marg grosschin Bemischir muncze polnischer zal di sy em gancz vnd gar mit
gute gereytem gelde beczalet han dorinne auch di pyctanczie vnd der pyctanczien meister der do
iszunt ist adir der her noch zukunftig wirt sal alle jar jerlich vf heben vnd nemen eyne marg
grosschin der vorbeschriben muncze vnd zal vff vnser liben frawen tag lichtelwey nu neste en zuheben
darnoch alle jar jerlich vff dem vorgenantem franczken vnd syme erbe doch mit sulchir vndirscheit
wen franczko syne frawe Margaretha adir ergeerben vormogen adir wellen di selbe marg zinses ablosen
vnd ab koufen dez sal en di pyctanczie vnd der pyctanczien meister gunen vnd sullen sy beczalen der
czen marg dz houptgutes vnd vorcessen zinse noch wochen zal mitenandir Auch ap der zins
der pyctanczien vnd dem pyctanczien meister vf den vorbestimten tag vnser liben frawen lichtelwey nicht
gefolt noch wurde So sullen sy vf franczken gut vnd erbe pfhenden vnd mit dem pfhande tun
als alle recht vorgerichte domete wern begangin dez zubekentnus hab ich vorbeschribner Comptir
myn Jngesigel an disen briff gehangin Noch gotis gebort Virczenhundert jar darnoch in dem ersten
jare an Sente Blasien tag do bey sint gewest her Jacob pfharrer zcu Tyncze her pet(er) huscompt(ir)
vnd pyctanczien mast(ir) her lorencz vnd her niclos hofmeistir vnd andir vil erbar geczug