Wir Boleslaw von gotis gnadin herczoge von slezien vnd herre cu Lignicz bekennen offinbar daz
vnse getruwen manne her stephan von panchewicz her herbort von ham her hannus von der wede her
niclus kockericz vlrich von bisedusdorf hannus salomon vnd pet(er) von swobusdorf han vunden vur
ein recht eweclichen deme von schowinb(ur)g Comentuwere cu der Olzin vnd sinen nochcomelingin
do selbist vnd den schultheisin vf dem Eygm cur Olzin daz die schultheisin ir hubin vnd ir len
nemen sullen noch der hubin czal in den dorffern des Eygins also von besiczunge stet in eren hantfestin
geschrebin ane also vil daz io der schultheise behaldin sal daz erbe daz her vnder sinem pfluge hot
Wer ouch daz ein schultheise eine hube adir mind adir mer adir ein len vuz sime gerichte vorkoufte
so sal der vorgenante von schowinb(ur)g adir ein ander Comentuwer der noch im kumt daz selbe erbe
vnd len lien Wer ouch daz ein schultheise eine hube adir mind adir mer adir ein len cu sime gerich
te koufte daz sal adir der vorgenante Comentuwer adir sin nochcomelinge lien Wer abir daz ein gebuw(er)
wedir den andern ein Czinshafte gut daz in daz gerichte gehorte koufte adir vorkoufte cu dem selbin
Czinse daz sal der schultheise lien wolde her abir den Czins nedirn adir hoen daz sal mit des Comen
tuw(er)s willen geschen Wer ouch daz ein gebuwer ein len hete daz vns dem gerichte comen we(re) vnd
daz len adir ein erbe dor vuz vorkoufte adir dor yn koufte so sal abir der Comentuwer daz erb vnd
len lien vnd ouch mer Waz kretseme in den dorferen des selbin Eygins legin di sal ouch der
selbe Comentuwer adir sin nochcomelinge lien vnd daz alle dese rede stete vnd gancz blibe so gebe
wir desin brif vnder vnsim ingesegil vnd ist geschen vnd gegebin cu Breslaw an dem nestin dinst
tage noch sente valentins tage noch gotes geburt tusent jar drihund(er)t jar vnd in deme
virczigistem jare do sint geginw(er)t(ic) alle vnse vorgenanten manne vnd niclaus vnser hofeschriber
den brif von vnsingehase geschrebin hot