In gotis namen Amen Alle dink dy do gescheen under der sonne vorgessen inguten wo sy nicht mit geczugnisse der briffe bestalt werden und befestint Dorumme wir Semo=
with von gotis gnaden Herczog czu Theschen meyster sance Johannis ordin von jerusalem czu bemen polan meren und ostirrich bekennen offentlichin in desim keginwortigen briffe
allen dy en isen horint adir lesin das wir mit vorbedochtem mute unsir priors und ouch mit rate und wissen unsir eldisten von newis usgesaczt haben an gebner recht
Zehnigen huben erbis in aller mosse als sy mit mossen und mit greniczen und mit keysirwacze und mit geholcze und mit ackern sundirlich mit der wese dy do heysit int
caliwese bemesin und begriffen sin das von aldirs gehort hat in unsim hoff czu der olsen der selben Zehnigen huben dry huben czu dem gerichte czur olsen das erbechte
hindin dem chuppegartin das bergfrid und den hoff der do by gelegin ist czur olsen mit dem dritten pfennige des egenanten gerichtis dorczu eyne gewonlich trift wir
geben und gegebin han dem ersam knechte Nickil schultheis von Contirsdorf und allen synen erben und nochkomelingen eweclichin czu besiczin durch dinstis willen der
uns und unsim ordin von synen eldirn und von ym geschen ist und noch von synen geerbin und nochkomelingen geschen sal Also das der egenante Nickil und syne
erben dy len des egenanten gerichtis enphoen sullen und haben von dem comethur czur olsen der do ist adir sin wirt czu cziten und ouch alle iar geben sal und sullen
vor den dinst gwelff phnuth pheffirs Sechs phnuth uf sente walpurg tag und sechs uf sente mertins tag dy andirn sybin huben sullen geben ouch dem comethur
als vorgescrebin stet so dy hube alle iar an czinse eyn polinsche marc dreyssin grosschin polinscher galdacht und wyrczik grosschin vor dy marc an beczalin eyne halbe
marc uf sente walpurg tag eyne halbe marc uf sente mertins tag und io von der hube eyn maldir dryirley getreidis wir scheffil wey wir korns wir gerste der
czu messe getreide io von der huben eyne scheffil korns und eyne scheffil habir So sal ouch der richter mit der gemeynde geben vor den schuler dem pfarrer eyne halbe
marc uf sente walpurg tag eyne firdunk und uf sente mertins tag eyne firdunk und sullen den schuler vorbas nicht besorgen doran sullen dy luten n so hif des com=
ethurs ackir triben noch gewonheit ouch sullen dy lute grasen unschedelich in sim holcze dorczu gebe wir en und sullen dy weyde als man den lock ussget ken krawinhan
uf dy linke hant uf dem hobil undir den eychen bis an den pheffir teych und genste dem pheffir teych an czu heben undir den eychen bis an den gebunten se und
ab dy eychen genten so sullen sy nicht huten bis dy eychen ab komen wer abir sache das der comethur messin wolde das sal vorbas ungemessin sin das das
stete gancz und unbrochlichin blibe von uns und unsin nochkomelingen dy priores und meyster czu bemen werdin und ouch comethur so habe wir czu eynir steten
sichirheit das Ingesigil unsis priors und meystirthum an desin briff lossen hengen das ist geschen czur olsen in unsim hose an sente hedwig tage uns libin frowen
wen noch gotis geburt tusint dryhundirt Iar in deme sebin und sebnczigsten Jare do sint by gewest unsir libin her elwidiger von lygewicz feldhaldin czu po=
lan her Johis wako czu bresla her nicols stengil gancz brud(er) her hanke von katibur czur olsen andris gancz brud(er) comethur her henrich phor francke hose
meist(er) petir gancz brud(er) unsis ordin czur olsen herre anckil petir gesse gebrud(er) von kursintowic nickis hof Rudiger von kuckenberk und petir klos von
Briege unsir scriber der desin briff hat gehat in bevelunge