In nomine domini amen. Ad memoriam euiuslibet rei gestam. Religionem plantare et fouere pium et sanctum opus esse dinoscitur, ut exinde fructus salutis eterne percipiatur. Hinc est quod nos Iohannes prepositus, Iohannes decanus, totumque capitulum ecclesie sancti Iohannis baptiste in Praga, notum facimus uniuersis, quod cum nos ex unanimi consensu et uoluntate nostra, de consilio et assensu reuerendissimi in Christo patris et domini, domini Iohannis, sancte Romane ecclesie tituli sancti Laurencii in Lucina presbiteri cardinalis, archiepiscopi Pragensis, apostolice sedis legati, uillam nostram dictam Sluenecz, sitam in districtu Pragensi, cum omnibus suis iuribus, pertinenciis, agris, pratis, pascuis, siluis, aquis, aquarum decursibus, molendinis, piscacionibus, uenacionibus, et aliis quibuscumque utilitatibus, ad dictam uillam spectantibus, uendidimus et alienauimus pro certa summa pecunie, uidelicet pro ducentis et quinquaginta sex sexagenis grossorum Pragensium, honorabili uiro domino Iohanni, preposito monasterii in Opatouicz, ordinis sancti Benedicti, Pragensis diocesis, et eiusdem monasterii conuentui, prout in litteris super hoc confectis plenius continetur. Nos uero, uolentes dictam uendicionem et alienacionem ratam et gratam habere, eam de certa nostra sciencia et unanimi consensu, pro nobis et successoribus nostris, tenore presencium approbamus, ratificamus, et confirmamus, promittentes bona fide, sine dolo et fraude, pro nobis et successoribus nostris, quod dictam uendicionem et alienacionem in nullo contraueniemus, nec per alium uel alios contraueniri faciemus, sed eam in omnibus suis articulis, clausulis, et condicionibus inuiolabiliter obseruabimus et faciemus obseruari. In cuius rei testimonium sigilla nostra presentibus sunt appensa. Datum Prage, anno domini millesimo trecentesimo octuagesimo tercio, indiccione sexta, pontificatus sanctissimi in Christo patris et domini nostri, domini Urbani diuina prouidencia pape sexti, anno quinto, die uero duodecima mensis Marcii.