Ich Brud(er) Walram sente Joh(ann)s orden zu J(e)r(usa)l(e)m co(m)me(n)d(ur) zur Olst(e)n tu zutwissen allen den dy dezin briff
zisen horen adir lesin zu eyme ewigen gedechtnisse das vor mich yn eyme geheg(e)n dinge komen synt dy
getruwen lute myns ordins vnderzese(n) von eloßdorff Niclos schulte an eyme teile vnd dy gancze ge=
meynde der lute am andirn teile vnd hab(e)n sich gutlich miteinandir vortrag(e)n vmb eyn hayn der des obge=
nante(n) Niclos schult(e)s vnd syner erbelinge erblich ist vnd vßwen(n)ig dryen greniczen ligt in sulchir mose das
gesatzt ist eyn Jar wen der selb hayn yn broche lyt so mag dy gemeynde do selbs zu eloßdorff alle ir vye
groß vnd cleyne keyns vßgenomen uff den selb(e)n hayn an dy weyde tryben welch g(e)thir sy wellen vnd das
noch and(er) Jar so man den selb(e)n hayn beset mit wynter sot vnd mit somer sot so mag der obgenante
Niclos schulte adir dy synen des genanten hayns genyssen so her allirbeste mag ane allis hyndernis
eyms irlich(e)n mensche(n) das em adir den synen dornoch ymmer zu schaden mochte komen vnd wen her
den selb(e)n hayn besnydet vnd bestent so mogen dy lute ir vye ouch uff den hayn tryben Ouch sal der
obgenante Niclos schulte adir wer des selb(e)n hayns besiczer ist alle Jar ewichlich(e)n geb(e)n eyn pfu(n)t wachses
der kirchen zur olst(e)n vnd sal vorbas me fry syn vn(d) vngehind(er)t von allirley bosucznisse wy man dy ymer
bene(n)nen mochte keyns vßgenomen cleyn adir gros von des selb(e)n hayns wegn ane das obne stet geschre=
ben von der weyde wegn Ouch mag der obgenante Niclos schulte adir dy synen den obgenante(n) hayn noch
ostern virczen tage broch(e)n e den andir lute vnd dy gemeynde anhebe(n) zubroch(e)n vnd vorsoymters sal her
en broch(e)n wen her mag vnd das dy berichtung(e) gancz feste stete vn(d) vnzustort ewichlich(e)n ane allirleye
ynlegunge von en allen gehald(e)n werde so hab ich myn Jngesigil an dezin briff lozin hengen do by synt ge=
wes(e)t dy erbi(n) lute Hanns schachow Niclos adilbuch ger(hard) michil pfarrer zu Meissen(n)ig Greyshan byschoff
heyn(n) pet(er) schulte von Jamin(n)ig pet(er) bylass Junge Hanns vom bruge vnd vil andir erbar lute Gegeb(e)n
zur olst(e)n noch got(e)s geburt dryzenhund(er)t Jar Nunczig Jar vnd dornoch ym achte(n) Jare am suntage als
man singet Jn der heilgen kirchen ffe(n)s est dominu(m)s