Wir Hedwig vnnd frederich von gotisgnaden Jnn Slesien herczoginne vnnd herczog fraw vnd herre zu legnicz zum goltberge vnnd zur Slaw ꝛc(etera)
bekennen offintlichin mit desim briue allin den die en sehin horin ader lesin das wir obgenante herczoginne als eine volmechtige vorweserynne
des obgenanten vnsers liebin sonis vnnd wir frederich sunis obgenand als ein rechter erbe der obgenante stat vnd lande Slaw durch wol
betrachtin rat des vnsirn vmb vnsir mergklichin noddorfft willin vnsir vnnd vnsir lande bestis domite suchende vnd vnser schaden vnd ergiste
czubezubenden vorkoufft abgetratin vnnd offgelossin habin vorkouffen abetratin vnd offlossin in crafft ditz briuis funfft marg geldis Jerlichis
vnsers eigen furstintlichin borgeschossis das wir habin vnd gehabet habin in vnd off vnser stat slaw vnd allir irer zubehorungin zugehorun=
ge der namngehantin stat off iren furstin nuczen gemessungin fruchtbarkeitin vnd allin andirn zugehorungin die darczu von rechte vnd aldirko=
men gehorin ader gehorin mogin nichtis awssgenomen clein noch grois wie man das mit sunderlichim namen ader worten benennen mochte Jn ey=
ne namen einis rechten widerkauffis vmb funffczig guete fertige hungarissche gulden mit dem gewichte des landis wemunge desir lande die wir
redelichin offgenom(en) habin vnd der volkomlichin beczalit sein gancz wolgedanckt vnd an vnsir nucz gewand habin denselbin kauff des borge=
schossis zuczelden vnd zubeczalin nemlichin czwee marg off sandte walpurgis tag vnd off den nestkomendin anquildin an guetin fertigen
hellern warunge desir lande vnd dem abir czwee marg off sandte michaels tag neste dornach komende vnd also furbas mer alle Jar Jer=
lichin den vorgenantn czins zuczelden vnd zubeczalin off die obingenante czeit ane alle widerrede vnd behelffunge dem ersamen vnnd
Erlichtigen hern hannese schreibersdorff bruder des ordins sandte Johans von Jrl(usa)l(e)m den selbin czins zuhabin vnd die weile her
leibet vnd lebet vngekrencktin vnd frey vnd vngehindertin domitte zutun vnd zulossin vnd seyne tode nach die gemeltn czinse ko=
men vnd gefallin sollin an seinen stetin wohin vnd zu welchim hawse her das wirt benummen nach seime behegelichin willin als ferre
her das bey seime lebin nichtis vorkouffte vnd off welche czeit Jm solchir czins nichtin beczalit wurde so sollin vnd wollin wir glob(en)
Jm in guetin truwin durch vns ader vnser amechtleute die iczunder sein ader hernachmals werdin czur Slaw Jn vnnd off der
egenantn vnser stat Slaw einczureitin vnnd Jm domete pfandes genuge czuscheffin vnd mit den pfanden zutun vnd zulossin ane alle rech=
tis offdrunge gehorsam alle recht dinglichin domette begangen wern off der obgenantn statmanne vnd bürgern allir Slaw eigene
abintewre czerunge vnd schadin dieselbin funff marg Jerlichis czinsis wir obgenante herczoginne vnd herczog von vnsirn furstintlichin
gnadn dem egenantn hern hannese schreibersdorff gelegin habin vnnd gereicht leien vnd reichen in crafft ditz briuis Jn allir mosse
als obgeschrebin steth Also vornemlichin das wir herczog frederich ader vnsir erbin vnd rechte nakomen die genantn funff marg gel=
dis Jerlichis czinsis wider abekouffin ader losin mogin vmb funffczig guete fertige hungarissche gulden warunge desir lande wenne wir
das zutunde werdin vnschedelichin vorsessin czinsin vnd wir hernachgeschreben burgirmeister vnd ratmanne der egnantn stat Slaw
die nw iczunder sein ader hernachmals werdin in czukunfftigin czeiten bekennen solichin obingedachtin vorkoufftin czins vnd globin dem ob=
genantn hern hannese vnd allin den die desin czins nach Jm habin werdin getruwlichin czurichtin vnd czubeczalin off die obgenante czeit
alle Jar Jerlichin von vnsirn vnd allir vnsir nachkomen statmann czur Slaw wegin nach befelunge vnd geheisse der obgenantn vn=
ser gnedigin hurschafft zutunde sie vnd zutununge vor allin andirn czinsin in allir mosse als denn vnsir vorfaren vnd wir solichin czins
vormols vnd zuczeitn den genantn vnser gnedigin hurschafft Jerlichin gericht vnd beczalit habin ane arg vnd vngeferlichin geistlicher
vnd werntlichin gerichte allenthalbin vngehindert das czu orkunde vnd rechtir wissin habin wir obgenante herczoginne in ganczer
vollir macht vnsirs genantn liebin sohnis dorczu her seinen ratn willen vnd wortin getan hat desin brieff lossin vorsigilt werdin mit
vnsirn anhangendin Jngesigil des denne wir egenant herczog fredrich hir an volkomlichin gebrauchen vnd wir vorgenantn burger=
meister vnd ratmann der stat Slaw sigil hiran auch habin hengin lossin Gegeben vnd gebin czur Slaw am sonobinde vor
Symonis vnd Jude der heiligen zwelffbotin tag Nach crists geburt vierczehnhundert Jar dornach in dem czwee vnd sechczigisten Jar
Dabeye seint gewest vnser besundern liebn getruwen der namhafftige Nickel von gersdorff homeister genand bernhard schreiber
dorff von der polniczschin koczynaw andreas holatsch vnd Jorge von Nemen vnsir schreiber den desin brieff warth befolin