Wonn gottes gnaden wir fridrich hertzog von slesienn zur lignitz Brieg (et)c(etera) bekennen vnnd thun kundt menniglich mit disem vnserm offenn brieffe Als vns der
durchleuchtigist Grosmechtigist furst vnnd her her ferdinand des heyligenn Römischenn reichs künig zu hungern vnnd Behem (et)c(etera) künig vnser gnedigister
herre vns geschribenn das sein Römische künigliche maiestat als ein regirender künig zu Behem vnnd Oberster Collator des priorats zu der Cron Behem
zu strakonitz auff des herrn Johann vonn rosenberge zur selbigenn zeit solches priorats Obersten meister vorrige beschehe bete vnnd bewilligung dem
werdigenn gestrengenn herrn frantzen Reibnitzenn vonn Leuder auff Boltzennstein die Comptorey zur Cleinenn Oelsenn sein lebenlang aus gnaden
verschribenn Auff sein vnserm gnedigenn Ersuchenn das wir Jme als gruntther vnnd des selbigenn Ort lanndtsfurst bemelte Comptorey aus gna=
diglichem gedanckenn dieselbige auff sein lebenn Confirmirenn vnnd Bestettigenn woldenn mit gnedigem vorprechenn das wir bey allenn vnsern
freiheittenn diennstenn rechtte(n) vnnd gerechtigkeittenn die vns ann solcher Comptorey zustendig gnediglich Bestenn gelassenn vnnd darbey gehandt=
habt wordenn habenn wir Jme auff sein seiner Römischenn küniglichenn maiestat gnediges schreiben auch des herrn vonn Rosenberge vo=
rige erlangete bewilligung vnnd bemelts herrn frantzenn mans faldige vns erzeigte diennste dasselbige nicht abschleglich sein wöllenn Vnd
gedachtem herrn frantzenn die meinn Comptorey zur Cleinenn Oelsenn auff sein lebenn lanng anneme(n) auffgenhomen Jme aus hochste(n) auch
sunderlichem furstlichem gnadenn als der Lanndtsfurst vnnd in erwegung der vorigenn ausgangenn bestettigung So der Erleuchte
Hochgebornne furst vnnd herr herr fridrich hertzog zu slesienn zur lignitz Brieg (et)c(etera) hochloblicher seliger gedechtnis vnser gnediger vnnd geliebter
herr vnnd vatter Jme Brieg am dreyzehenndenn tag des monats Octobris des sibennzehenndenn Jars vnnd nachmals vnser gnediger vnnd geliebter
herr furst vnnd anherr hertzog Jurg auch sunderlichs vleis sich des Erwirdigenn Edlenn wolgebornnenn herrn Johann vonn rosenberg
die zeit meister vnnd herr zu strakonitz Jme wirdigenn Erennuestenn herrn Benczenn Bauskhenn zur selbigenn zeit Comptor zur Cleinen
Oelsenn gegebenn alle seine gutter in vnsern landenn gelegenn vnnd zur solcher Comptorey gehorig vorvns vnnd vnsere erbenn gnediglich Con=
firmirt vnnd bestettigen Confirmirenn vnnd bestettigen gemelttem herrn frantzenn Reibnitzenn dieselbenn alles hiemit Jnn Crafft vnnd macht
ditz vnsers brieffs wöllenn Jnen auch bey demselbigenn alles als der lanndtsfurst vor vnns vnnd vnsere Erben schutzenn vnnd schirmen
fur allenn vnnd iedenn beschwerenn gnediglich schutzenn vnnd handthabenn Alls treulich vnnd vngeuerlich doch vns vnnd vnsere erbenn
ann vnserm furstlichenn freiheittenn gerechtigkeittenn diennstenn rechtte(n) vnnd gerechtigkeittenn Jnn allenn wege gantz vnnschedlich des zu vrkundt
mit vnserm anhangendem Jnsigell besigelt Gebenn vnnd gethann zu Brieg freitages vor dem sontage Reminiscere Jnn der vastenn
Nach Cristi vnsers liebenn herrn geburtt funfftzehenhunderttenn vnnd funff vnnd dreissigistenn Jarenn