Wir Ferdinand der ander von Gottes gnaden Erwehlter Römischer Khayser,
Zu allen zeitten Mehrer deß Reichs, In Germanien, zu Hungern, Behaimb, Dalmatien, Croatien vnnd Sclauonien (etc.) König, Ertzhertzog zu Osterreich, Marg
graff in Mährern, zu Lutzemburg vnnd in Schlesien, Hertzog, vnnd Marggraff in Laußitz (etc.) Thun khund vnnd bekhennen hiemit offentlich, das Vns der Wirdige Caspar Questenberckh, Abbt
der Clöster Strahaw vnnd Iglaw des Præmonstratenser Ordens, Visitator vnnd Vicarius, in vntertänigkeit zuvernehmen gegeben, Was massen etliche in Vnserm Marggraffthumb Mährern gelegene, vnd
von alter zum Closter Iglaw gehörige Vier Dörffer, mit nahmen Teütschen Branitz, Sancti Jelerani vnnd Lidmeritz, sambt einem Mayrhof Mikulowitz genandt, von weiland Kayser Rudolphen dem andern, Christ
miltesten angedenckhens, durch dero Kayser(liche) vnnd Königliche donation vnnd Confirmation, dem bemeldtem Closter Strahaw zu dessen besserem vnterhalt aigenthümblich vbergeben vnnd einverleibt worden, Deß
welchen Dörffern vnnd ortten, aüch das Closter theils von Zehenden, aüß den zehenden vnnd aigenem gewächs zahl vnnd geniesst. Weill aber solche eingebrachte Wein biß hero in die anger
regten Closters Hauß oder Pfarrhoff zü Iglaw nur abzulegen, aber nicht am Zapfen außzuschenckhen vnnd zuversilbern verstattet worden, Sondern mitt grossen Vnkhosten vnnd des Closters merckhlichen schaden,
Sonderlich nachdem manches Jahr die Wein schlecht gerathen vnnd die Fuhren theür sein, allereist auß dem Land vnnd nach Prag muessen gefüert werden: So hatt Vns demnach gedachter Abbt g(e)t(reuer)
Vntertänigisten fleisses angelangt vnnd gebetten, Wir gerueheten bemeldtes Closters Jmbsiche nott vnnd armutt zubehertzigen, vnnd dasselb genedigist allso zuversehen vnnd zubegnaden, damitt einem Abten
dergleichen einkombene Wein, aüch alda zu Iglaw in bemeldtem Closters Pfarrhoff offentlich am Zapfen außgeben vnnd außschenckhen zu lassen, frei vnnd vngewehret sein möchte.
Vnnd Wir dan angeboren vnnd getrachtet, wie vns das die Stifft vnnd Clöster in Vnsern Königreich vnnd Landen, durch vielfaltige eingefallene Landtszerüttlungen vnnd Widerwertigkheiten, maisten theils
vmb das Jhrige vnnd in grosses abnehmen khomen vnnd gerathen, Vns aber denselben, so vill müglichen, widerumb auffzuhelffen, vnnd dardurch die Ehr vnnd den dienst Gottes zubefördern, von hohen Ambts we
gen obliget vnnd gebüert, Darneben aüch an jhm selbß billich ist, Was durch die obangedeütte donation vnnd einverleibung dem Closter zum besten gemeint vnnd verordnet worden, Das es aüch zu wollem
nutz gebracht werde. Allso haben Wir auß genedigister wollmeinung, gegen offtermeldtem Closter, alls welches wegen guetter Ordnung vnnd disciplin, aüch vleissiger abwarttung
deß Gottesdienst sonderlich gerüembdt wird, in gedachtes Abbts gehorsambstes suechen vnnd bitten, gehedigist gewilliget, Thun solches aüch hiemitt vnnd in krafft dises brieffes, vnnd begnaden, aüß Kay
ser(licher) vnnd Königlicher macht, alls König zu Behaimb, vnnd Marggraff in Mährern, ietzigen vnd khünfftigen Äbbten des Closters Strahaw, solches gestallt, daß Sie allen den ienigen, von den obbenandten ortten
an Zehenden, vnnd aüß dem aigenen gewächs zusamen gebrachten Wein, da Jhnen denselben am raiß zuverkauffen, oder weckhzufüern nicht gelegen oder gefellig, in Vnserer Statt Iglaw, nicht allein able
gen, Sondern aüch offentlich am Zapfen, ohne der Iglawer, vnnd sonsten mennigklichens eintrag, Aüch vngeachtet irgender widerigen begnadungs prætension, welche hier nicht statt haben solle, Zunutz
vnnd handen des Closters versilbern vnnd außschenckhen zulassen, iederzeitt hinfüro frei vnnd zugelassen, Aüch der Burgerschafft vnnd gemein alda zu Iglaw, vnd sonsten iederman dergleichen anger
zapften Wein vmb die bezahlung zunehmen vnnd abzuholen, vngevährt vnnd vnverbotten sein soll. Vnnd gebieten darauff allen vnnd ieden Vnsern Obern vnnd Nider officirern in Vnserm Marg
graffthumb Mährern, Aüch Burgermaister vnnd Rath der Statt Iglaw, ietzigen vnnd khünfftigen, Vnnd sonst menniglichen, Das Sie gegenwerttigen vnnd khünfftige Äbbte offtbemeldtes Closters Strahaw
Zu allen zeitten, bei diser Vnserer wollmeinenden begnadung, vngehindert verbleiben lassen, Nichts darwider thun, noch solches anderen zuthun verstatten sollen, So lieb einem ieden ist, Vn
sere schwere straff vnnd Vngenad zuvermeiden. Zu vrkhund haben Wir an disen Brieff Vnser Kayser(lich) vnnd Königliches Insigel anhangen befohlen. Geben in Vn
serer Statt Wien, den zwaintzigisten Monatstag Januarij, Jm Ein Tausend Sechshundert, vnd Ein vnd zwaintzigisten Jahr, Vnserer Reich, des Römischen im andern, des Hungrischen im dritten, vnd des Behaim(bischen)
Ad mandatum Sac(rae) Cæs(are)æ
Ma(ies)t(a)tis proprium
Philipp Fabricius m(anu) p(ropria)