Wir Ferdinand der Dritte von Gottes gnaden Erwöhlter Römischer Käyser
zu allen zeitten Mehrer deß Reichs in Germanien, zu Hungern, Böheimb, Dalmatien, Croatien, vnd Sclauonien (et)c(etera) König, Ertzhertzog zu Osterreich, Marggraff zu Mähren, Hertzog zu Lutzenburg, vnnd
in Schlesien, vnd Marggraff zue Laußnitz: Bekennen hiemit offentlich vor Jedermenniglich, demnach Vnß der Würdige Vnser Andächtiger vnd lieber getreuer, Crispinus, Abbt deß Stiffts vnd Gottshauß Strahof, Visitator deß H(eiligen) Præmonstratenser
Ordens im Königreich Böheimb, vnd dessen Incorporirten Landen, demüetigst zuuernemmen geben, wie daß Er noch vor etlich Jaren, die Probsteÿ deß Jungfraulichen Closters zue Doxan, dem P(atri) Norberto, Suppriori vnd Professo auß gedachtem Strahof, resignirt, mit
angeheffter gehorsambster Bitte, Wir gerueheten, daß solch seine Resignation, nach bißhero verflossener Zeit, in welcher gedachter P(ater) Norbertus, wegen vngelegenheit deß Kriegs Zustands, seine schuldige Pflicht præstirt, billigend vns gefallen zulassen, dieselbe auch zu confirmirn, vnnd zu
bestöttigen. Alß haben Wir in Käyser(lichen) vnd Königlichen gnaden angesehen, solch gedachten Abbtens zimbliche vnd gehorsambste Bitte, wie auch mehr berümbts P(atris) Norberti, Vnß eingerumbts Gottseelige leben, wandel vnd anderbahr guete Qualiteten, vnd derowegen, solche Resigna
tion gnedigst ratificiret vnd bestöttiget. Thuen solches auch hiemit wissentlich alß Regierender König zu Böheimb in Crafft diß brieffs, Mainen, vnd wöllen, daß der P(ater) Norbertus nun vnd hinfüro angeregtes Stifft nach anweisung Jhrer Geistlichen Rechten vnd Satzungen, nicht
allein in Spiritualibus zur Lob, Ehr, vnd Ehr deß Allmächtigen, vnd fortpflantzung der H(eiligen) allein seeligmachenden Catholischen Religion, sondern auch in temporalibus alle desselben Vnderthanen, vnnd zugehörige Guet, ob Stiffts Nutz vnd auffnemmen, seins
besten verstands vnnd vermögen nach Regieren, die Ordens Disciplin fleissig in Acht nehmmen, vnnd in Summa alles das ienige was einem getreuen Prælato, vnnd Vorsteher, Crafft seines gethanen Pflichts zustehet, vnnd gebüret, auch zuerhaltung deß Stiffts
wolherbrachten Priuilegien, Recht vnnd Gerechtigkeiten, nützlich vnnd vonnöthen sein wirdt, Jhm treulich anbefehlen, sein lassen, in Obacht nehmmen, vnnd auffs beste befördern. Gebieten hierauff allen vnnd Jeden Vnsern Vnderthanen,
was Würden, Standts, Ambts oder wesens die sein, daß Sie mehrerwehnte P(atrem) Norbertum vor einen ordentlichen vnnd von Vnß confirmirten Probsten, beÿ den Jungfraulichen Closter zue Doxan erkennen vnnd Ehren, Jnsbesonders aber Vn
sern Königlichen Stadthaltern in Vnserm ErbKönigreich Böheimb, daß Sie Jhn in seiner Iurisdiction, Administration oder sonsten nirgentz Jnn nicht beirren, noch durch andere zuthun gestatten, sondern Jhm vielmehr in allen billigen Sachen, die hülff
liche hand bietten, vnd gebürende Schutz halten, dem Jungfraulichen Conuent aber, vnd zum Stifft gehörigen Vnderthanen einhalten, daß Sie Jhm alß Jhren Vorgesetzten Haubt allen schuldigen Respect, Ehrerbiettung vnd gehorsamb leisten, auch anders nicht
thuen sollen, beÿ vermeidung Vnserer schweren straff vnnd vngnad. Zu Vrkundt diß mit Vnserm Käyser(lichen) vnnd Königlichen anhangenden Secret Jnsigel bekräfftiget. Geben in Vnserer Stat Wien, den Siebenzehenden Monats tag Decembris, Nach Christi Vnsers lieben
Herrn vnnd Seligmachers gnadenreichen Geburt im Sechzehenhundert dreÿ vnnd viertzigisten, Vnserer Reiche, deß Römischen im Siebenden, deß Hungerischen im Neunzehenden, vnnd deß Böheimischen im Siebenzehenden Jahr.
Ferdinandus
Ad mandatum Sac(rae) Cæs(areae)
Maiestatis proprium
J(ohann) Walderode