Wir Sigmund von gotes gnaden Romischer kunig zu allenczeiten merer des Reichs vnd zu Vngern
zu Behem Dalmacien Croacien zc(etera) kunig Bekennen vnd tun kunt offenbar mit disem brieff allen den
die In sehen oder horen lesen Daz wir dem Edeln Albrechten von Coldicz vnserm Cammermai
ster vnd hauptman zu Bresslaw vnd zu der Sweidnicz vnserm Rate vnd lieben getruen volle
macht gegeben haben vnd geben mit disem brieue daz Er alle vnsere zuspruche die wir zu
Mathis Dompnyk haben vor den Mannen oder den Ratmannen Vnsers furstentumes vnd
Stat Bresslaw handeln moge den vorgen(anten) Mathis Dompnik fur sy zuheyschen denselben Man
nen vnd Stat vnsere zuspruche an vnser stat furzulegen vnd vnser sache vnd zuspruche die
wir zu dem vorgen(anten) Mathis Dompnik haben mit dem rechten do var In zuuolfuren in glicher
wise als ob wir selbs do gegenwertig weren Vnd was er also von vns(er)n wegen den vorgenan(ten)
Mathis ansprechen wirt das ist vnser ganczer wille vnd sol auch souil craft vnd macht habn
als wir das selber getan hetten Mit vrkund disz briefs versigelt mit vns(er)m kuniglichen anhan
gendem Insigel Geben zu der lewtsche Nach Crists geburt vierczehenhundert Jar vnd dar
nach in dem xxiiij(ten) Jare des nechsten donerstags nach vnser lieben frawen tag Annunciacionis
Vns(er)r Ríche des Vngrischen zc(etera) in dem xxxviij des Romischen in dem xiiij vnd des Behemische(n)
Im vierden Jaren