WIr Wolffgang von GOttes gnaden deß heiligen Stüels Zü Maintz Ertzbischoffe, deß heiligen
Römischen Reichs durch Germanien ErtzCantzler vnnd Chürfürst (etc.) Bekennen vnnd thun kundt offentlich mit diesem brieff, Demnach vnser lieber getrewer Hanns Wilhelm vonn Rodenhausen
vnndertheniglich ersucht vnnd gebetten, wir wolten ihme in nahmen sein selbs, auch in macht vnnd vorberütten gewalts, Hannß Geörgen von Rodenhausen, Johann Harttman, von Eppenstain vnnd Ludwig Wilhelmen von
Heusenstamm, als verordenter Vormünder, Weilandt Conraden von Rodenhausen nachgelassener Söhne wegen, mit nahmen, die ienige Erb: vnnd Mannlehen, die etwa Conradts Vatter seeliger Eberhart Rodenhausen,
vnnd Conradt von dehem, außabsterben weilandt Philippsen von Bechling, welcher ehe ehelicher leibs Erben verstorben, von wegen Jhrer Haußfrawen vnnd Kinder, alß Erben, sambtlichen von vnserm Vorfarn Ertzbischoff
Dilharten löblicher gedechtnuß Zü lehen empfangen, gnediglich leihen, vnnd vmb deweils einen halben parthen vom Zehenden Zü Asselhaim, Hundert Zwentzig guld(en), vnnd denhe ein bestetigung, vmb Vberzeigliche
Zügesagt, darinn der Stamm von dehem von solchem ihnem Theil lehen nichts außgeschlossen, abtretten, vnnd dem Stamm von Rodenhausen, ewiglich geben vnnd Vbergeben, auch proceß darinn weitter außgeführet, Mit er=
bietung, da iemands were, der sie oder dennen von Rodenhausen ietzo oder künfftiglich derenthalben ansprechen vnnd forderung, mit gelassen wolt, denselben ieden Zeit Rechtens Zü verhelffen, Daß wir dambt dieses seiner
vnnderthenige pitt vnnd erbieten in gnaden angesehen, Vnndt haben ihme Hannß Wilhelmen von Rodenhausen in nahmen sein selbs, vnnd gedachter seiner gebrüdern von Rodenhausen, vnnd ihner Mennlichen leibs vnnd lehens
erben, nachvolgende Erb: vnnd Mannlehen gnediglich gelihen, Vnndt leihen die ihme, in crafft diß brieffs, was wir ihme von gnaden vnnd Rechtswegen obbemelten gestalt, daron leihen sollen vnnd mögen, In allern
maaß dieselbe, weilandt Conradten von Rodenhausen, vor sich auch Hannß Geörgen seinen brüdern, vnnd dann Hannß Wilhelmen vnnd Ebeart Wilhelmen gebrüdern vnnd vettern von Rodenhausen, von vnserm
nechsten Vorfahren seeligen empfangen vnnd getragen hat, Erstlich Zü Erblehen den Burgseß, das ist die behausung beij der linden von Pfordten Zü Rinnenburgk, mit ihrer Zügehörung, Jtem Zü Mann=
lehen dreissig Morgen Ackers vngefehrlich ahn theilsainen Aussen ahn Zweien oder dreien stücken, Jtem Sechszehen morgen vngefehrlich In der leimkauten, an der Awe steigen, Jtem dreij morgen stossen auff
den weeg neben der Weitkarten wiesen, Mehr dreij morgen auff der andern seiten auff stossen auff die Weitkart Zwerch, Jtem ein morgen den theilsainen pfadt, Jtem anderthalbmorgen oben der straß an Chilbert
von Rodenhausen, Jtem Vier morgen hinter dem Vinghauß, vnnd Zween Garten beij der mühlen, ein anderthalben morgen, Jtem Zween morgen Vber dem Rüdikheimer wege, beij dem Baum, Jtem Vier
morgen hinter dem Rauthauß beij der Sandt Kauten, Mehr sechs morgen ahn Zweien stücken, sambt der Kerchen Zü Rinnenburgk verhart, vor Viertzig gulden, Jtem Viertehalben morgen, ligen herab vor der Pfordten,
sambt der Kerchen vnnd vngefehrlich vor Ein vnnd Zwentzig gulden, vnnd sunst alle vnnd ihne andere güeter, wehr vnnd vnbewehr, so von dem Vberbleib der lehen, auß weilandt Philips Bechling
von wegen seiner Mütter gefallen, vnnd geerbt sein, Wo sie auch, oder kurtz oder lang wehr Vmb der ersahen würden, Züvor den lehen auß Philipps Bechlingen, wie obgemelt, aberkomen, sollen sie dieselbe
anßanzeigen, vnnd von vnß vnnd vnserm Ertzstifft Zü Mannlehen empfangen, haben vnnd tragen Vnnd der genant Hannß Wilhelm von Rodenhausen, hat auch ietzo, von wegen sein selbs, auch in nahmen
alß obstehet, solch obgeschrieben lehen von vnß vnnd vnserm Ertzstifft empfangen, darümb in trewen gelobt, vnnd leiblich einen Aydt Zü GOtt vnnd den heiligen geschworen, vnß vnserm Nachkommen, vnnd Ertzstifft
Maintz, getrew, holdt vnnd gehorsamb Zü sein, vnsern schaden Zü warnen, frommen vnnd bestes Zü werben, Solch lehen getrewlich Züuerdienen, mit thewen Aijden, fasten vnnd diensten, die Zü thun haben, darneben
Zü geloben vnnd Züuerwaren, so ein brieff Zü geben vnnd Züuerneuen, alß offt daß noht gepürt, dermaassen er die ietzo von vnß empfangen, vnnd vnß darümb gelobt vnnd geschworen hat, vnnd nemblich alß daß
Zü thun, daß ein Mann seinem rechten Herren, von solcher Erb: vnnd Mannlehen wegen schuldig vnnd pflichtig Zü thun ist, trew alß solches lehen Rechtens gewonheit ist, Sonder gefehrde, Wir haben auch in
diesen leihung außgenommen, vnser vnnd vnsers Gotteshauß vnnd Ertzstiffts Maintz, vnser Mann vnnd eines ieglichen Recht, Also argelist vnnd gefehrde hierinn gentzlich außgeschlossen, Vnnd deß Zü
Vrkundt haben wir vnser Jnsigel an diesen brieff thun hencken, Gegeben Zü S(anct) Martinspurg Zü Erestatt, den dreissigsten Julij, Anno Domini Millesimo Quingen=
tesimo Nonagesimo Primo. / & Jost Wilhelmen vnnd Conraden von Rodenhausen
Ex mandato eiusdem R(everendissi)mi D(omi)ni D(omi)ni Wolfgangi
Archiepi Moguntin(i) Principis Electoris