Wir Johann Adam von Gottes gnaden deß Heiligen Stuls zu Maintz
Ertzbischove, des Heiligen Römischen Reichs durch Germanien Ertzcantzler und Churfürst, Bekennen und thun kundt offentlich mit diesem brieff, das wir unserm lieben getrewen Hanns Wilhelmen von Rodenhausen vor sich selbsten unnd
in krafft unnd vormahls gemelts Hanns Georgen von Rodenhausen, so dann deß Wilhelmen unnd Conraden von Rodenhausen gebrüdern Conrads seligen Söhne wegen hernachgeschriebene Mannlehen gnediglichen gelihen haben, leihen auch ihme die hiemit unnd in krafft
diß brieffs, In allermassen der gemelter Hanns Wilhelm von Rodenhausen, von unserm nechsten lieben herrn unnd vorfahren, Ertzbischoff Wolffgangen, Churfürsten, gedechtnuß, empfangen unnd getragen hatt, Inhalts eines loß ledigen daruber gegebenen lehenbrieffs
von wortten zu wortten hernachgeschrieben als lautend: Wir Wolffgang von Gottes gnaden des Heiligen Stuls zu Maintz Ertzbischoff, des Heiligen Römischen Reichs durch Germanien Ertzcantzler und Churfürst, Be=
kennen unnd thun kundt offentlich mit diesem brieff, das wir unserm lieben getrewen Hanns Wilhelmen von Rodenhausen, unser lehenpflicht erlust und gebetten, wir wolten ihme in nahmen sein selbs, auch in krafft unnd vormahls gemelts Hanns Georgen von
Rodenhausen, sodann Hartmann von Lowenstein unnd ludwig Wilhelmen von Hatzfeldt, als verordneten vormundern weilandt Conraden von Rodenhausen nachgelassener Söhne wegen, Mit nahmen deß Wilhelmen unnd Conraden von Rodenhausen, die Jenigen Mannlehen
so etwan sein Conradts vetter seliger Eitel von Rodenhausen von absterben weilandt Philipsen von Buseckh, welcher ohne einige leibs erben verstorben von unserm vorfahren Ertzbischoff Albrechten löblicher gedechtnuß unnd unserm Ertzstifft von newem empfangen
unnd getragen, unnd durch sein Philipsen von Buseckh absterben unserm Ertzstifft auch lediglich anheimbt unnd heimgefallen seint, Unnd von ermeltem unserm vorfahren in best den ihenigen jetzt gemelts Hanns Wilhelmen von Rodenhausen unnd seinen
Menlichen leibs erben haben zu rechtem newem Mannlehen gnediglich unnd leihen worden. Dergestalt das er Eitel unnd seine Menliche leibs erben thun unnd leisten sollen, was von alters der andern lehengüter auß solchem lehen verpfilcht war, her=
gebracht weren, da selbendes theils von unnd von unnd umb die nachkommen unnd erben Manns zuhaben unnd zutragen, unnd darauff sich erblich geeiniget, da Jemandts wehre, der sich an den Hannsen Rodenhausen, oder den Eitel darumben an sprach unnd an=
lang, mit welchen wolte demselben Jederzeit darumb mit recht begegnen. Das wir darauff ihme underthänige bitt unnd erbetten in gnaden angesehen, Unnd haben ihme Hanns Wilhelmen von Rodenhausen vor sein selbs unnd gedachter
seiner gevettern, Unnd ihrer Mennlichen leibs lehens erben wegen, nachfolgende Mannlehen gnediglich gelihen unnd leihen die ihme in krafft diß brieffs, Wie wir ihme von gnaden unnd rechts wegen, obberürter gestalt daran leihen sollen unnd mögen, Inallermassen
dieselbe weilandt Conradt von Rodenhausen von uns unnd Hanns Georgen unnd Hannsen unnd Hanns Wilhelmen unnd Eitel Wilhelmen gebrüdern unnd vettern von Rodenhausen von unserm nechsten vorfahren seligen empfangen unnd getragen hat,
Unnd seind diß die lehen davon offtgemelt, Nehmlich der eigne leuth so der alte Holtzapffel gehabt hatt, Item einen theil des Zehenden zu wendelshausen, Item einen theil des Zehenden zu Wernershausen, Item zwey theil des grossen Zehenden zu Bredenfelden,
Item einen theil des Zehenden zu Bernhardtshausen, Item den halben theil des Zehenden zu Dannen, Item zwey pfundt unnd vierzigk Mütz, mit einem weisbrodt unnd schillingk werts des alten Mütz auß der Mühlen zu Haintzenhain, Item funfftzehen schilling
Wetterawer pfenning von unndern unnd unndern holtzapffels güttern zu besth windthausen. Unnd der obgenant Hanns Wilhelm von Rodenhausen hatt auch solchs von sein unnd obgemelter von Rodenhausen eines theils wegen, ob=
obgedachte güetter zu Mannlehen empfangen unnd daruber in trewen gelobt unnd leiblich einen Eydt zu Gott unnd den heiligen geschworen, Uns unnd unsern nachkommen unnd Ertzstifft Maintz getrew, holdt unnd gehorsamb zu sein, unsern schaden zuwarnen, frommen
unnd bestes zuwerben, diß lehen getrewlich zuverdienen unnd trewen, unser unnd unsern des thumgestiffts, daruber zu geloben unnd zuschweren, so dick des noht geschicht, In allermassen er diß solchs von unnd empfangen, Daruber gelobt unnd geschworen hat,
Unnd nehmlich deß alles des zu thun das ein Mann einem Rechten herrn von Mannlehens wegen schuldig unnd pflichtig ist zuthun unnd als Mannlehen recht unnd gewonheit ist, ohne geverde. Wir nehmen auch in diß er lehenung
auch unser, unsern nachkommen unnd Ertzstifft Maintz unnd Mann unnd eines Jeglichen Rechts unnd geverde. Da han zu Urkundt haben wir unser Secret Insigel ahn diesen brieff thun hencken. Der geben
ist zu Aschaffenburgk in unserm Statt Maintz, Sontag den dreyzehenden Monats tag Julij Anno Domini Millesimo Quingentesimo Nonagesimo primo. Unnd der obgenant Hanns Wilhelm von Rodenhausen hatt auch solchs von uns
unnd in nahmen wie obgemelt diß lehen von unnd empfangen, daruber in trewen gelobt unnd leiblich ein Eydt zu Gott unnd den heiligen geschworen, allem dem Jenigen getrewlich nachzukommen, so obberürter unser vorfahren seligen lehenbrieff mit sich bringet,
ohne geverde. Da han zu Urkundt haben wir unser Insigel ahn diesen brieff thun hengen. Der geben ist zu Aschaffenburgk den zehenden tag Monats Octobris Anno Domini Millesimo Sexcentesimo Secundo.
Ex mandato eiusdem R(everendissi)mi D(omi)ni D(omi)ni Joannis Adami