Wir wenczlaw von koldicz Albrecht Thime vnd Emme gebruder hern zu Coldicz Bekennen vnd tun kunt mit dissem kegenwertigen briue vor vns vnser Erbn vnd nachkomen die von dem hochgebornen fursten Ern wilhelm marggraffen in meissen lantgraffen
in doringen vnd pfalczgraffen in sachsen sinen Erbn vnd nachkomen vnd der hochgebornen ffurstin frowen Elyzabeth marggrafin in meissen vnser liben gnedigen frowen fleburg vnser halbe vnd stad mit allen gerechten rechten eren sonder nuczen friheitn
dorffern wazern wisen welden eckern wisen weiden heiden wassern molen manschafftn lehen geistlichin vnd werntlichin mit icleichm zcollen vischereyen genellen vnd an gefellen nichtusmedt vsgenomen Als wir sie gehabt habn Ane alleyne was wir vor
der czeit vber vnser egenanter herre vnd frowe ane vns vmb die frawunge in teidingen waren dauon wir kowft vorhabn ader vorgebn habn darvber wir dissen briue gegebn habn ader die bekennen vnd hantschrift machn der vnsern Egenante
herre vnd frowen daran sie vns nach in den wir die vorkowft vorgebn ader vorlegen habn nicht hindern sullen Vnd habn yn die mit guter wissen vnd willen ane allen abeslag in halene in gesaczt vnd in geantwurt in eyme pfande vor Sechs
Tusint schok vnd Acht hundirt schok grosschin friberger mungen die sie vns bereit minclich beczalt vnd wir sy in vnsern fromen gewant habn vnd daczw vor Sechs hundirt schok grosschin friberger mungen die sie ouch an dem slosse fleburg funff
hundirt schok gross vnd an den molen hundirt schok grosschin vor buwen sullen Als beirnidt geschrebn stet die selbe slos vnd stad fleburg mit sinen zugehorningen Sullen wir obgenanten hern von koldicz bynnen Achte Jaren hien die nach
gebinge die briuee nehst nacheinander volgn von yn nicht wider heischen noch losen vnd sie sullen vns vnsern erbn ader nachkomen fleburg das hus vnd stad mit siner zugehorningen Als obin benant ist in der czeit ouch nicht wider zu losn
gebn Aber wenne die Acht Jar vorgangen sin vnd sich vorlawffen habn vnd wir wem wir gonningen von darnach wenne wir wollen fleburg vnser slos vnd stad mit aller sienen zugehorningen Als obinbegriffen ist von vnsern gnedigen
herrn sinen Erbn vnd nachkomen vnd von vnser liben gnedigen frowen wider losen vor Sechs tusint schok Acht hundirt schok grosschin friberger mungen Als die zu der czeit in dem lande zu meissen genge vnd gebe ist ane geferde Vnd daczw
vor Sechs hundirt schok grosschin ouch friberger munge Als sie die an dem slosse vnd moln zu fleburg vorbuwen Als hernach geschrebn stet Vnd also wenne wir ader vnsr erbn ader nachkomen Nach den Egenante Acht Jaren die losunge
wider tun wollen das sullen wir vnsern gnedign hrn sinen Erbn ader nachkomen vnd vnser gnedige frowen ein gancz halp Jar zu vore lassen wissen vnd an das vorkundigen Vnd sullen denne vnsern gnedign hrn sine Erbn ader nachko=
men ader vnser liben gnedigen frowen ir gelt Sechs Tusint schok grosschin Acht hundirt schok grosschin Vnd Sechs hundirt schok grosschin Als sie die vorbuwen friberger munge die denne in den lande zu meissen genge vnd gebe ist ane
geferde in dem selbn halbn Jare gancz vnd gar beczaln vff dem slosse zu Rochlicz ader zu lissennig in welchim sie wollen ader kisen werden ane alle hindernisse Vnd wenne wir vnsern Egen hrn sinen Erbn ader nachkomen ader vnser
gnedign frowen ir gelt als vorgenant ist Also gancz vnd gar beczalt habn So sullen die Egen vnser gnediger hre sine Erbn ader sine nachkomen Ader vnser vnser gnedige frowe vns vnser slos vnd stad fleburg mit allen sinen
zugehorningen Als obingeschrebn stet wider antwurten vnd gebn ane allen vorczog wider spruche vnd an alle geferde wem sie vns das nu wider geantwurt habn So mugen wir die slos vnd stad mit allen sinen zugehorningen
Als obinbenant ist eynem andern vorkowffn ader vorkowffn wenne wir wollen Vnd vnser gnedige frowe Egenanten hern in sinen Erbn ader nachkomen in den lehn vnd rechtn di sie an den gutn habn die zu fleburg zugehoren Vnd von yn zulehn
gebn Were ouch das der obegen vnser herre sine Erbn ader nachkomen Ader vnsr gnedige frowe ir gelt ouch wider habn wolden vngende den Acht Jaren Als vorgenant ist das sullen sie vns ein gancz halp Jar zu vore sagn vnd vorkundign Vnd
wir sullen denne yn siene Erbn ader nachkomen vnd vnsr gnedigen frowen Sechs tusint schok Acht hundirt schok Vnd daczw Sechs hundirt schok grosschin Als sie die vorbuweten Als obingeschrebn stet der obgenante friberger munge Als in der czeit in dem
lande zu meissen genge ist bynnen den halbn Jare beczaln anff dem slosse rochlicz ader lissennig in welchim sie kisen werden als ouch obingeschrebn stet ane allen vorczog Teten wir des nicht So mugen die marggrauen vnser gnediger hre sine Erbn
ader nachkomen Ader vnser gnedige frowe das slos vnd stad fleburg mit allen sinen zugehorningen als obengeschrebn stet eynem andern vorseczn in eynem pfande wenne sie wollen vor Sechs tusint schok Acht hundirt schok grosschin vnd daczw
vor Sechs hundirt schok grosschin Als sie die vorbuwetn Als obigen friberger munge Als obengeschrebn stet Vnd also wenne die obgen vnser gnediger herre sine Erbn ader nachkomen ader vnsr gnedige frowe das vorseczten So sulle sie schaffe
das vns dy ader der mit der losunge bekennen vnd zu losunge siczen Vnd vns das vber ouch sulche briue gebn Als vns dy obgen vnser gnediger herre sin Erbn vnd nachkomen Vnd vnser gnedige frowe iczunt tun vnd getan habn ane geferde Ouch
sullen vns die obgenant vnser gnediger herre sine Erbn ader nachkomen Vnd vnser gnedige frowe An dem slosse fleburg funff hundirt schok grosschin Vnd an den molen di selbme hundirt schok grosschin fribergermunge buwlichen
vnd nuczlichin mit guter gewisser biderber Erber mane an der pflegin zu fleburg vnd mit wisser biderber burger di der stad zu fleburg redelich vorbuwen die selbn Sechs hundirt schok obgen friberger munge Als sie die in male vorbuwetn die sulln
wir yn mit den Egen Sechs tusint schocken Acht hundirt schokn friberger mungen die denne in dem lande zu meissen genge vnd gebe ist gancz vnd miteinader wider gebn wenne wir fleburg wider von yn losen vorbuwen sie aber mynner wenne
die Sechs hundirt schok grosschin So sulle wir yn ouch mynner wies das buwde wider keren vnd gebn vnd an den Sechs hundirt schokn abeslan Ader mer denne Sechs hundirt schok grosschin Sulln sie nicht vorbuwen Sy tetene denne
mit vnserm gutin willen Vnd was sie mer wenne Sechs hundirt schok grosschin vorbuwetn dauon wir vnsr willen nicht gegebn das sulle wir nach bedorffen in das nicht wider gebn noch ensal vns ouch an der losunge nicht hindern
noch keinen schaden brengen ane allee geuerde Was sie ouch in dem selbm slosse losen das dauon vorpfant ist ader daczw brengen das sie ouch wol tun mugen das sulln wir ouch wider von yn losen vnd brengen dor also wil geldis als sie dis in
sich bracht vnd zu yn gelost habn wenne wir fleburg wider von yn losen das sie vns auch wider zu losn gebn sullen ane arg Innechten wir aber die anff dy czeit nicht wider gelosen So mugen sie das an pfande behalden Ader das eynem andern
vor vorseczn Vnd also wenne sie die vorseczn das sie den mit den gutern an vns weisen sullen das vns der zu losunge sicze Vnd vns die wider zu losen gebe Als obengeschrebn stet vnd als vnser Egen hre sine Erbn vnd nachkomen vnd vnsr gnedige
frowe yn sullen ane sonder rede Were ouch abwir Egen von koldicz alle ane Erbn abgingen di got vor sie So sal der obgenant vnsr gnediger hre erbn vnd nachkomen ader vnsr gnedige frowe die slos vnd stad fleburg mit
alle deme das von der Cronen zu Behm zu lehn get der Cronen zu Behm vor Sechs Tusint schok Acht hundirt schok vnd daczw vor Sechs hundirt schok gross als sie die vorbuwetn als obgenant ist fribergermunge also in dr czeit in
dem lande zu meissen genge vnd gebe ist wider zu losen gebn ane widerspruche vnd an allee geferde Vmb hat der obgen vnser gnediger hre vor sich sine Erbn vnd nachkomen vnd vnsr Egen gnedige frowe in yrem briue
ane geferde globt Were es das er ane erbn abginge das er fleburg vnsr slos vnd stad mit allen sinen zu gehorningen als obengeschrebn stet an nymande brengen sal noch enwil Sie gebn vns denne ouch sulche briue
vnd sicherheit das sie vns zu losunge siczn Als vnsr gnedig hre sin Erbn vnd nachkomen vnd vnsr gnedige frowe getan habn dam wir dene ouch sulche briue wider gebn sullen das wir alle dys vorigeschrebene
rede stucke vnd Artikl Also stete vnd gancz vnvorbruchlich haldn sullen vnd wollen ane arg des zu eym bekentnisse vnd merersicherh habn wir vnsere Ingesigele mit willen vnd wissen an dissen brieff lassen hengen der da gegebn ist
zu lissennig Nach Gots geburte dryzehnhundirt Jar darnach in dem Vier vnd Nunczigistn Jare Am dinstage in den Pfingstheiligen tagen