Wir bruder Jacobus vonn dem gnaden Got Apt zur Camenitz bekennen offintlich mit diesem briffe allen den
die en sehen horen ader lesen vnnd besundern den Ersamen weisen Eltisten vnnd der gantzen Zceth des
Kauttnergs der Gemeine das vor vnns komen seynn vnnser lieben Getrawen der Scholtz mit de Eldis
tenn vnnsers dorff czw Reichenaw vonn danne valten Swartze Zceig dieses briff bortig ist vnnd ha
benn bekannth vnnd beczewget alß recht ist vonn eyner ganntzen Gemeyne wegen das der ebe genanthe
valten von fromen Erbern Eldern von vater vnnd Muter bey en yn dem genant(en) dorffe elich geborn
ist die sich alle tzeith gar Erberlich gehalden haben alß guthe lewth vonn den sie vnnd auch wir ny
anders gehoreth haben den alles guth besundern das oben gemelte valten Swartz vonn kintliche tag(e)n
bißher alle tzeith ganntz toguntfame gelebet habe Erberlich vnnd fromlich sich gehalden habe darumb
bithe wir euch alle die mit diesem briff besucht werden dem offtgenant(en) valten Swartz vmb vnns(er)n
willem gunst forderunge vnnd gutten willen czw erczeigen wobe vnnd alß offte her Ewer bedarf
sende wir seynn das welle wir yn begerender tzeith yn allem gutten vorgleichen Geben czw Camenitz
den negsten Sonnobeth vor aller heyligen dreifaldikeith tag vnnder vnns(er)m Segel das wir czw ge
czewgniß off diesen briff haben lossen druken Alß man schreibet noch Crist geburth Tawsent
vierhundert vnnd In dem Newen vnnd Achtzigsten Iar