Wir Fridreich von gotes gnaden Römischer kays(er) zu allenzeiten Merer des Reichs, Hertzog ze Osterreich, ze Steyr, ze Kärnden
vnd ze Krain, Graue ze Tirol (et)c(etera). Bekennen offenntleich mit dem brieue: Als der Edl vnser besunderlieber Vlreich von Rosenberg
weylent Hertzog Fridreichen von Osterreich vnserm lieben vettern loblicher gedechtnuss Sechtzehentausent guter wolgewegner guldein
vngerisch vnd ducaten nach Innhalt ettleicher geltbrieue von demselben von Rosenberg aussgangen, der ainer vmb sechstausent, vnd zwen
yeder vmb viertausent, vnd der vierd vmb zwaytausent guldein lauttet, das in ainer Sum(m) die bemelten sechtzehentausent guldein bringet,
schuldig worden, vnd aber derselb vnser vetter derselben Sum(m) guldein vnbczalter von diser werlt abgangen ist, dadurch dieselb geltschuld vnd
brieue an den hochgebornen Sigmundten Hertzogen ze Osterreich (et)c(etera) auch vnsern lieben vettern vnd erben desselben hertzog Fridreichs Sun als
nagsten erben komen vnd geuallen sein, Dieselben brieue vns dan derselb vnser lieber vetter hertzog Sigmund, vnd alle gerechtikait, so er
daran hat gehabt, williglich vbergegeben hat, nach lautt des vbergabbrief, darumb von Im aussgangen. Daz wir dieselb geltschuld vnd
brieue vnd alle vnser gerechtikait, so wir daran haben oder mochten gehaben, dem Edln vnserm besunderlieben Porsiken von podiebrat, vnd von
Cvnstet, Gubernator des künigreichs Behem(b), weyter vbergeben haben, vnd geben auch wissentlich in krafft des briefs in sölher mass, daz der
selb Gubernator die vorgenannt Sum(m) Sechtzehentausent guldein von dem egenannt(en) von Rosenberg eruodern, vnd die in der gütikait, mit
Recht oder in anderweg, wie Im dann das am pesten fügen wirdet, inpringen, Vnd alles das darinn hanndln vnd tün söl vnd mag, als wir
selbs tün mochten, Nach der vorgenannten Gelt schuldbrief lautt vnd sag. Mit vrkund des briefs. Geben zu der Newnstat an sand Andrees
abent des heyligen zwelfpoten, Nach Cristi gepürde Viertzehenhundert vnd in dem Vierzvndfunfftzigisten, Vnsers Reichs im fünffzehend(en)
Vnd vnsers kaysertumbs im dritten Jaren.