Wir Wenczlaw von gotes gnaden Romischer kunig zu allen czeiten merer des reichs vnd kunig zu beheim Bekennen vnd tun kunt offenlichen mit disem briue
allen den die in sehen oder horen lesen Das wir angesehen vnd betracht haben mancherley swerlichen schaden die vnsern kunigrich vnd lande zu beheim von
krieges vnd orley wegen anligende sein vnd druff das dasselbe land in fride vnd gemache gesaczt werde vnd wir bey vnser wirdickeiten vnd rechten vnd ouch sust
allermennclich bey recht bleibe So haben wir mit wolbedachtem mute vnd gutem rate des durchleuchtigisten fursten hrn Sigmundes kuniges zu vngern (et)c(etera)
vnsers liben bruders des hochgeborn Josten Marggraues zu Merhern vnsers liben vettern vnd anderr vnsern vnd des reichs fursten herren edeln vnd getrewen
rechter wissen vnd vnsern guten trewen gelobt vnd verheissen geloben vnd verheissen in craft dicz briues das wir alle sulche briue die wir den lantsherren lantlutn
Steten vnd der ganzen gmeine geistlichen vnd werntlichen leuten der Cronen zu beheim geben vnd vns verschriben haben das wir alle sulche stucke volfuren vnd
halden sollen dieselben briue die czwischen vns vnd den lantsherren in disem kriege vber teidinge ggangen sind als es in den briuen geschriben ist Ouch als
wir an Sechs lantshern kumen sein als in denselben briuen eigendlichn geschriben stet darumb ouch vmb die stucke vnd ander sachen dieselben herren vs
sprechen solten des sein wir kumen an den egenan(ten) vnsern bruder kunig Sigmund zu vngern vnd an vnsern vettern Marggraf Josten von Merhern vnd was
die drumb vssprechen das sol von vns beyderseyte gehalden werden Ouch als wir vsgenomen haben drey stucke des ersten vmb das Burggrausampt
zu Prage vnd andre Ampte als in denselben briuen stet dornach vmb die Muncze der Behemischen grossen vnd ouch vmb die lantschepfen die man
nennet kmetn des sein wir kumen mechticlichen an die egen(anten) vnsern bruder kunig Sigmund von vngern vnd vnsern vettern Marggraue Josten von Merhrn
Also was die vssprechen das das gehalden werde vnd ab iemant in des landes der lantsherren oder sust geistlicher oder werntlicher vnd ouch der Stete
recht griffe vnd die vrteile vnd vsgesprochen rechte nicht liesse furgank haben vnd irs rechtes brechen wolte oder der egen(ante) vnser bruder der kuniges von
vngern vnd vnser vettern Marggraue Joste vsspruche vnd sunderlichen vnser briue brechen wolte die wir den egenan(ten) herren geistlichen vnd werntlichn
ritern vnd knechten Steten vnd der gmeine vber die richtunge geben haben das sol man an vns brengen vnd vns drumb biten das wir die gerechikeyt
vnd ouch das recht lassen fur sich geen vnd dorzu beholffen sein mit der herren rate vnd hulffe Vnd weres sache das wir dorzu nicht tun wolten das sol
man brengen an den egenan(ten) vnsern bruder den kunig zu vngern oder an den dem er das beuilhet vnd derselbe sol ganze macht haben als der egen(ante) vnser
bruder der kunig von vngern wem ouch das an denselben vnsern bruder oder weme er das beuilhet gebracht wirdet der sol dornach steen das die vrteile
vnd die vsgesprochen rechte fur sich geen vnd volbracht werden in einem driteil Jares vnd wurde es in einem driteil Jares nicht volbracht So sol der egen(ante)
vnser bruder kunig Sigmund oder der dem er das beuilhet mit den herren ritern knechten vnd Steten sich aneinander behelffen wider iederman der dorwid(er)
were das die rechte vnd die vrteile irn volzogen werden Vber alle diese stucke sollen aneinander geloben die geistlichen die herren die lantlute Stete
vnd die ganze gmeine das die vorgeschriben stucke fur sich geen vnd des sollen sie einander helffen vnd der egenan(te) vnser bruder kunig Sigmund von vngern
vnd der dem er das beuilhet sol den herren den geistlichen den lantluten vnd ouch Steten vnd der ganzen gmeine beholffen sein vnd sie in hienwider wem
vnd wie ofte des note geschicht das die vorgeschriben stucke fur sich geen vnd genzlichen gehalden werden wider iedermann der dorwider were vnd was sie
durch des rechten willen taten vnd einander hulffen als oben geschriben stet das sollen wir ir keinem zuarge keren noch vsheben wann sie das von vnsm
sunderlichen geheisse vnd gebote getan haben Mit vrkunt dicz briues vor sigelt mit vnserm kuniglichen Maiestat Ingesigel Geben zu Prage nach crists
geburte dreiczehenhundert Jare vnd dornach in dem Sechsundnewnczigisten Jare des Suntags als man singet Judica in der vasten vnserr reiche des
Behemischen in dem dreyunddreissigisten vnd des Romischen in dem Czwenczigistem Jaren
Ad mandatum d(omi)ni Regis