Wir Ferdinand der Dritte, von Gottes gnaden Erwehlter Römischer Kaiser, zue allen
Zeitten Mehrer des Reichs in Germanien zue Hungarn Böhaimb Dallmatien, Croatien, Vnd Sclauonien König, ErtzHertzog zue Osterreich Marggraff zue Mährern Hertzog zue Lutzenburg Vnd in Schlesien, Vnd Marggraff zue
Laußnitz (et)c.
Bekennen hiemit offentlich vor Jedermenniglich, daß vor Vns erschienen seindt, die Würdigen Vnsere Andächtigen, Vnd liebe getreuen, Benedict Abbt Vnsers Stiffts Vnd Gottshauß Bruckh an der Taya, Vnd Vicarius Generalis deß Heyligen Præmonstratenser Or=
dens, Vnd Crispinus Abbt Vnsers Stiffts Vnd Gottshauß Strahof, Vnd Visitator deß Heyligen Præmonstratenser Ordens in Vnserem ErbKönigreich Böhaimb, Vnd derselben incorporirten Landen; Vnd haben Vns züuernehmen gegeben, was massen bey Allgemeiner Versamblung der Præ=
latten, Vnd Abbtte deß Heyligen Ordens, auß Vnserem ErbKönigreich Böhaimb, Ertzhertzogthumb Osterreich, Vnd Marggraffthumb Mähren, so gehalten worden ist, den zehenden Junij, deß Achtzehenhundert Ein Vnd dreissigsten Jahrs, der Andächtige Vnser lieber getreuer Frater Stephanus,
zue einem Abbten zue Selau erwehlt, ernennt, Vnd eingesetzt worden; Auch Obwohlen derentwegen, zümahlen circa temporalia sich allerley differentiæ erreget, so seye doch dasselbe nunmehr allerdings verglichen, auch gedachter Fr: Stephanus nachmahls für einen Abbten zue Selau erkennet
Vnd Ihme deß Closters so wohl in Spiritualibus alß temporalibus würckhlich eingeräumbt, einmüethig geschlossen worden, mit Vnderthenigster Bitt, Wir geruheten alß Regierender König zue Böhaimb, diesen der Prælaten gesambten Schluß gnedigst genehmb zuehalten, auch mehrernannten Fr: Stepha=
num, in Vnsern gnedigsten schutz zünehmen, Vnd Ihme circa temporalia nach notturfft Vorsorgen zuelassen. Ob nun wohl einer Königlichen Declaration vonnöthen gewesen were; Ob gedachts Stifft Selau der Abbttey auffs Neuwals einuerleibt, oder der Vor Auff solche weiß getrennet
werden künne: Nichts destoweniger aber, weilen solches einer Vnd andernseits nach zweiffel gehabt, Vnd sich nun daruber die gesambten Prælati Comprovinciales dieses Heyligen Ordens, auf ein solches weiß miteinander Verglichen haben, auch Von Vns solcher Vergleich durch ein absonderliches Diploma
bereits gnedigst confirmirt worden: Alß haben Wir ferner angesehen deß Ihme derentwegen so bitt, wie nit weniger gedachts Fr: Stephani Vns gerühmbtes Gottsfürchtiges Priesterliches Leben, Wandel Vnd erfahrenheit in Würthschaffts Sachen, Vnd darinn in Kayser= Vnd Königlichen
gnaden verwilliget: Thun Vnd verwilligen darinn alß Regierender König zue Böhaimb hiemit Vnd in Krafft dieses, wissendt= Vnd wohlbedächtiglich, also Vnd der gestalt, daß obgenannter Fr: Stephanus, nach Innhalt obenerwehnter Schluß, ein Abbt zue Selau sein, Vnd darfür Von menniglich
erkennet, gehalten, Vnd geehret, auch Ihme nicht allein die Administration deß Stiffts Selau, Vnd dessen pertinentien, so viel derer im Königreich Böhaimb gelegen, eingethan, Vnd die Vnderthanen mit dem huldigem gehorsamb an Ihme gewiesen, sondern auch Ihme bey allen Landtagen, züsammenkünfften,
Vnd Versamblungen die gebührende Session, Stimm, Vnd præeminentz gegeben Vnd gelassen werden soll. Also daß Fr: Stephanus nun Vnd hinfüro Vorernanntes Stifft Vnd Closter Selau, Vnd desselben künfftige Conuent, nach seines Heyligen Ordens instituto Vnd aufsatz, so wohl in
spiritualibus, zue Lob Vnd Ehr deß Allmechtigen, auch fortpflantzung der Heyligen Allein Seeligmachenden Catholischen Religion, alß auch in temporalibus alle desselben Vnderthanen Vnd Verwandte zuegehörigen, zue deß Stiffts nutz Vnd aufnehmen, seinem besten Verstandt Vnd Vermögen nach, regie=
ren, die Ordens disciplin fleissig in acht nehmen, Vnd in Summa alles das, was einem getreuen Abbt Vnd Vorsteher, seiner obliegenden Pflicht nach aignet Vnd gebühret, auf züerhaltung deß Stiffts wohlherbrachten Priuilegien, Recht, Vnd Gerechtigkeiten, nutzlich Vnd diensthlich sein wirdt, thun Vnd lassen
solches sein lassen, Vnd auffs beste befördern solle. Vnd Gebietten darauff allen Vnd Jeden Vnsern nachgesetzten Obrigkeiten, Königlichen Vnd Haubtleuten, Vnd allen Vnd Jeden Vnsern Inwohnern Vnd Vnderthanen, was Würden, Standts, Ambts, oder Wesens die sein hiemit gnedigst Vnd ernstlich, daß
Sie Ihme Fratrem Stephanum für ein ordentlich Vnd Vns Vnd bestätigten Abbten zue Selau halten, ehren, Vnd erkennen, Ihme auch an seiner administration nicht hindern noch irren, weniger andern solches züethun Verstatten, die zue solchem Stifft Vnd Closter zue Selau gehörige Vnderthanen aber ermahnen
schuldig sein, Ihme allen gebührenden Vnd schuldigen gehorsamb in Vnderthänigkeit zueleisten Vnd züerzeigen, allesambt mit andern pflichten, bey Vermeidung Vnserer schweren Straff Vnd Vngnad: Zue Vrkundt haben Wir diß Vnser Schreiben mit Vnserem Kayser= Vnd Königlichen anhangenden Secret Insigel
bekräfftigen lassen. Geben in Vnserer Stadt Wien, den Achtzehenden Monatshtag Decembris, Nach Christi Vnsers Lieben Herrn Vnd Seeligmachers Gnadenreichen Geburth im Sechtzehenhundert drey Vnd Viertzigsten, Vnserer Reiche deß Römischen im Siebenden, deß Hungarischen im Neunzehenden, Vnd deß Bö=
haimbischen im Siebenzehenden Jahre.
Ad mandatum Sac:(ræ) Cæs:(areæ)
Maiestatis proprium
(signature)