Wir Ferdinand der Dritte, von Gottes gnaden Erwöhlter Römischer Kaiser
zu allen zeitten, Mehrer deß Reichs, in Germanien, zu Hungarn, Behaimb, Dalmatien, Croatien, vnd Sclauonien König, Ertzhertzog zu Österreich, Marggraff zu Mähren, Hertzog zue
Lutzemburg, vnd in Schlesien, vnd Marggraff zu Laußnitz. Bekennen offenblich mit diesem brieff, vnd thuen khundt allermäniglich, demnach vnß der Würdige vnser Andächtiger vnd lieber getreuer Frater Vitus
Rösler, Abbt deß Closters Seelau, vnterthänigst zuuernemmen geben, waß gestalt Er durch seines Heiligen Præmonstratenser Ordens gebreuchige Election, Canonicè vnd mit einhelligen Stimmen zum Abbt erstermelten
Closters Seelau erwöhlt, vnd eingesetzet worden währe, Vnd weillen Ihme vermög vnserer Verneuerten Königlichen Landes Ordnung obliegen thette, in temporalibus hierüber vnsere Königliche Confirmation zue
suechen, So hat vnß Er vmb ertheilung derselben vnterthänigst angelangt vnd gebetten; Wann Wir dan gnädigst angesehen, solche seine demüetige zimbliche bitt, vnd darein in gnaden gewilliget. Alß haben
Wir solche seine zum Abbten zue Seelau fürgangene Wahl hiemit in Kaiser: vnd Königlichen gnaden ratificirt, vnd bestättiget, ratificirn vnd bestättigen auch dieselbe auß habender Macht, vnd vollkhommenheit,
alß Regierender König In Behaimb, hiemit wissentlich in krafft diß brieffs. Vnd gebiethen hierauff allen vnd ieden vnsern vnderthanen, waß Würden, Standts, Ambts oder wesens, die in vnserem Erb König=
reich Behaimb sein, insonderheit aber, dem Ordinario Loci, wie auch sonst ein iedermänniglich, daß Sie gedachten Fratrem Vitum Rösler Abbten zue Seelau, sambt dieses Stiffts gantzen Conuent, bey solcher beschehener
Wahl, vnd dieser Vnserer hierauff erfolgten gnädigsten bestättigung geruehiglichen verbleiben lassen, darwider nit thuen, noch auch die zue besagtem Stifft gehörige vnderthanen, Ihme Abbten, vnd dem Conuent
allen schuldigen gehorsamb zuleisten, Verhindern, oder sonsten in etwas irren, weder das andere züethuen Verstatten, sondern hiegegen Ihme, gleich wie gegen seinen Vorfahrn, alß Abbtn zue Seelau
Verhalten, vnd sonsten in allen Ihme Von rechts: oder gewonheits wegen bey denen Landtagen, Zuekhunfften, König: Landtaffel, vnd andern gerügtnussen, Sessionen, Würden vnd Herrlichkeiten, Vn=
weigerlich admittirn, Vnd Zuelassen, darfür erkennen, Ehrn, vnd halten sollen, bey vermeidung vnserer Schweren Straff vnd Vngnad, das meinen Wir Ernstlich, Zue Vrkundt diß brieffs besiegelt mit Vn=
serm Kaiser: vnd Königlichen anhangenden grössern Insigl. Geben ist auff Vnserm Schloß zu Preßburg, den Sechsten Monats tag Aprilis, im Sechtzehenhundert fünff vnd fünfftzigsten, Vnserer Reiche deß