Ich pru(e)d(er) heinrich zv der zeit prior dez chloster(s) ze prukke sand Augustins orden vnd alle mein noch chomen . vnd ich pru(e)d(er) fridreich zv der zeit
Sup(er)ior dez vorgenanten chlosters vnd alle mein noch chomeden vnd der conue(n)t der pru(e)d(er) aller da selben vnd alle vnser nach chomeden . Wir viehen vns tu(e)n chu(n)t
alle den di disen prief lesent oder horent lesen . di nu lebent vnd her nach chunftig sint daz wir vns v(er)ainten haben mit gu(e)ter v(er)tachnuz hinz der edeln
vnd erberigen vrovn vravn herburgen hern albers hausvraw van chu(n)nring durch der tru(e)n vnd durch der gu(e)ter willen . di si vns hat getan vnd vnsern
nach chomeden pru(e)dern geschaft vnd ge ebigt hat zwai phunt geltes vnd sibenzehen phenning wienner munz di da ligent ze h(er)zog(en)bvrn auf
behausten holden vnd ir rechtes aygen ist vnd si ge chauft hat von dem hakennvger hern Leutolten vnd seiner hausvrawn vrovn chunigunden
der si vns selb(er) di vor genant vrov vrav h(er)burg sol inrichten vnz an irn tod dar nach sulle wir vns ir selb(er) vnd(er)winden vnd si vessen als ein
istleich man sein gult von seinem holden vessen sol dar vber hat vns di vor genant vrav vrav h(er)burg gegeben virzich phunt p(er)aiter phenning
wienn(er) munz der wir schon gewert sein also beschaidenleich daz wir vnd vnser nach chomen pru(e)d(er) ir vnd allen irn vodern besund(er)leich hern
fridreichen van p(er)tav d(er) ir vater gewesen ist vnd vravn h(er)burgen irer mu(e)ter vnd h(er)n dietreich irn pru(e)d(er) vnd zwain albrechten di ir wirt
sint gewesen vnd einem hansem irn sun vnd einer Elzpeten ir tochter sullen alle iar vnsund(er) zv den vir ch(ro)temb(er)n gedechtnuz haben
dur(ch) vns aller ir(er) vordern sel dez mitichen nachtes mit ganzer vigilge vnd dez phinztages margen mit selmesse als vil wir pru(e)der mugen zv der zeit
gehaben . wer auer daz daz vns wirt erhaft not daz wir sein in den ch(ro)temb(er)n nicht zv chomen mochten van siechen oder van andern irrtagen . so sulle
wir is legen in den ochtagen hin nach also beschaidenleich daz man ir sol geben zv der ch(ro)temb(er) ein halbs phunt phenning den pru(e)d(er)n zetroste vnd ir phru(e)nt
ze pessern daz si sein dester williger got ze piten vm ir vnd ir(er) vodern sel . wer aber daz daz wir od(er) vnser nach chomen pru(e)d(er) dez nicht enteten van
chainer saumichait oder lasait zv den selben zeiten als vor gescriben stet so sullen di vorgenanten zwai phunt geltes vnd sibenzehen phenning wienn(er) munz
sich veruallen haben an ir(er) nast erben mit sant dem virzichphunt phenning der si gewert sullen weren van alle dem gu(e)t daz wir haben in dem lant ze
ostereich mit vnserm gu(e)ten willen . wellent auer ir(er) nast erben di vorgenanten zway phunt phenning vnd sibenzehen phenning von vns losen so sull wir
in sev ze losen gewen an alle wider red vm vir vnd treizig phunt phenning wienner munz also beschaidenleich daz man vm di vorgenanten vir vnd treizig
phunt phenning sol chaufen ander gult also daz man da van lege alle iar allez daz daz vor gescriben ist . vnd sol auch dan di selben gult nimermer ver
chauft werden vnd steatichleichen pei dem chlost(er) beleiben vnd di selb vorgenanten zway phunt vnd sibenzehen phenning geltes sol man d(er)nen an sand Michels
tag . dez ist gezeug der erwer herr her alb(er) von chu(n)nring zv der zeit hauptman vber di vor genanten stat ze pruk vnd di erwerigen ritter h(er) vlreich d(er)
veingast h(er) alb(er) der gensel h(er) ott von fischamund h(er) Leutolt van stadlav vnd di purger ze prukke heinrich der zudig Niclas der veirer symon der engl
wulfing an dem ekke vnd daz dise stub vnzebrochen beleib so geb wir der erwerigen vnd edeln vrovn vrovn h(er)burgen von chu(n)nring disen prief zv einem
waren zeug vnd zv einem offen vrchu(n)d der sache v(er)sigelt mit vnsern paiden Insigeln dez prior vnd dez conuencz . vnd daz diz vorgenanten sach der sich
verpu(n)ten habent di pru(e)d(er) ze pruk der edel vrov vrovn h(er)burgen von chu(n)nring stet vt vngebrochen beleib daz bestet ich pru(e)d(er) Augustin zv den zei
ten p(ro)uincial vber ostreich vnd vber payern vber chernten vnd vber pehaim sand Augustins ordens mit dem Insigel meins p(ro)uincials ampt . der
prief ist gegeben da von christus gepu(e)rt warnergangen dreuzehenhundert iar dar nach in dem dreuntreissigisten iar an dem haligem auff(ar)t
tag ze wienn