Ich Leupolt von chrueg Lantschriber in Oesterich und Gotfrit der Richter ze Chrems mein sun. veriehen und tůn chunt
allen den di nu sint und her nach chunftich werdent. di disen prief horent oder sehent lesn. Daz d(er) Vlrich sun Liebmano
sun so nu Got gnad purger ze Chrems mit siner hausfrown vron Gerdruten und aller siner erben gůtlichem willen
stete nu haben allez daz gescheft daz sein vater der Liebman hat getatn dem erbn Goteshaus ze Chotweig. durch sin(er)
sel willen. Daz ist ob der Gvfnich an dem perig drei weingartn. an der vresleiten ainen weingarten. ze Radndorf zwen
weingartn. ze Chrems zwai phunt phenning wien(er) mvntz. ze rehter gult ewichleich. an den weingarten an der holzlaeiten
in dem taellant. den sol der vorgenant Vlrich sun Liebmano sun habn ze seinen tagn ze rehtem leipgeding und swenn
er stirbt so gehet der selb weingart hin wider an daz Goteshaus ze Chotweig. reht und ledichleich on all wider red sein(er)
hausfrown und sin(er) erben. Daz dise red furbaz stete bleib on allen chriech furbaz und on alle ansproch. dar uber han ich
und Gotfrit d(er) Richter ze Chrems mein sun ge gebn disen prief ze ainem vesten urchund beslozzen mit uns(er)n insigeln.
Und sint des zeug. Gotz. Bartholome. perhtolt perndotfer. Geroen des Riht(er) schreiber. purger ze Chrems. und die purg(er)
ze steyn. Cholman. chunrat d(er) Dürst. hertweich. Leupolt. fridrich prüd(er) Gotfrit. chunrat d(er) hurnpech sein pruder
Leutwein. heinrich von steyn. hermen von phaffndorf. Gotfrit putz. und ander frum leut den daz wol chunt ist.
Diser prief ist gebn ze steyn. do von Christes ge purt warn dreuzehn hundert iar. in dem dritten iar. an
sant Jacobe tag in dem snit.