Ich Hainreich Chlofer ich ver gieh vnd tuen chunt an disem prief allen den die disen prief lesent
oder hozent lesen die nu lebent oder her nach chunftig sint. daz mein swiger vro Chungunt. herr
bayern wib dem got gnade vnd ir chindel vro Diemut mit aller ir friunt rat vnd zv der
zeit da siu iz wol getuen mochten ver chauft habent ain acker datz Grotzze der selb ge reut da
gewesen ist dem erbern herrn hern Reinhart ze den zeiten pharrer datz Grotzze im vnd seinem gotzhous
des heiligen herren sant veites vnd allen seinen nachchumftigen vmb vier phunt phenneigen wiener
munzze der si gar vnd genzleich gewert sint an allen irn schaden. vnd da von daz mein swiger die
vorgenant vro Chungunt vnd ir chindel vro Diemut selber aigens Insigel niht enhabent gibe
ich dem vorgenanten erbern herrn hern Reinhart pharrer datz Grotzze disen prief zv ainem warn
gezeuge diser sache ver sigelten mit meinem Insigel. vnd sint auch des gezeuge Ote der chelner
Perchtolt der waldhuter Ote der Geyer. Hainreich phaffter vnd ander frume leut genuege
den disiu sache wol chunt ist Der prief ist geben da von christes ge burde warn er
gangen dreuzehen hundert Iar an dem funft vnd zeveinzigisten Iar dar nach an sande
Iohannes tag ze sunwenden ::