Ich Ort von dem Gaein und all mein erben verjehen und tuen chunt alle den di disen prief sehent oder horent lesen. Daz wir der erber
ritter her Erhart der Eneuz und sein hausfraw vraw Agnes und all ir erben versazt habent irz rechten aygenz swaz sew habent in dem
Lanzfridepach ein hof und ein lehen und den hofen auf dem perig und daz dem vogter und daz lehen auf dem teurperig und daz
danchwarten auf dem teurperig und dreizzich phenning purkrehtz di dient man von eim holz und daz der Linn im Ewenpach und
daz lehen dem chegel in dem Ewenpach und daz endlein am Geyerperg und daz endleichen in ponpach und ein mul daz herperg
daz habent si mir versazt mit der beschaidenhait daz ich und mein erben in daz selb guet schullen gelazen gewen sehz jar alle jar
zer liechtmess. Daz suln wir ich und mein erben in stet zeuchalten mit unserm trewn an all gever und verpintent auch sich des
mein erben under mein insydel und gib in dar uber disen prief versigeltn mit meim insydel. Da ist zeug her fridreich von
Laden her neyhart von planchenstain der prief ist gewen nach christpurd dreuzehenhundert jar und dar nach in dem
dreizzigisten jar an dem phinztag - -