Ich Ott vnd ich Ortolf hrn Hælmweigs Svn von Chuleb dem got genad veriehen offenlich an disem brief
vnd tven chunt allen den di disen brief an sehent læsent oder horent lesen di nu lebent oder her
nach chunftig sint. daz vnser veter her Hærtneid von Sæchsen vnd vnser vater her Hælmweich von
Chuleb den got genad des Gotzhaus guet ze dem Chotweich des an sezzich drew phunt geltz sint
vnd auf gestiften holden gelegen ist vnd gelegen in dem Hozwach inne habent gehabt. vnd daz
daz selb guet dem vorgenanten Gotzhaus ledich ward mit irm tod. Nu hab wir mit vnser gnedi
gen heren bet Herzog Albrechts vnd Herzog Otten von Osterrich vnd auch vnser bet vnd dienst
willen vnsern gnedigen herren abt Wulfinge den Altenburgær daz dem Chotweich mit sampt der
samnung des selben Gotzhause erbeten daz si vnser vorgenanten herren von Osterrich bet vnd vnsern
dienst habent an gesehen vnd vns daz vor genant guet verlihen habent mit alle dew vnd dar zue
gehort gestift vnd vngestift besuecht vnd vnbesuecht als es vnser vodern emher inne gehabt
habent. vnd swenne daz ist daz got vber vns gebeut daz wir nicht ensin so ist daz vorgenant
guet dem e genanten Gotzhaus recht vnd redlich von vns vnd von allen vnsern erben vnd nach
chommen dem vorgenanten Gotzhaus ledich worden an allen chrieg vnd dar in daz stæt vnd vnzer
brochen beleib geb wir in disen brief versigelten mit vnser baider anhangenden Insigel der auch ge
schehen ist do man zalt von Christs geburt Treuzchen hundert Iar dar nach in dem fvnf vnd
dreissigistem iar an sant Lorentzen abent