Ich chvnrat der Egerer von holnburch. Vergich an disem prief. Daz ich gechauft han ainen tzehent. von hartleim dem Nöderch von holn
burch. Der gelegen ist. datz Eytzendorf. pei Welnch. vnd von dem man dient alle iar an sand Michels tag. funftzehen. pfennig tze purch
recht. dem Gotshavs tze Chötweich. Vnd des getzentaill avch hat. von dem selben Gotshavs maister Seybots des moler wrib. dem got genad
vnd ier erben tzu funftzehen. pfennig purchrechts. Den selben tzehent hat mier. vnd meinen erben gelichen. mein genadiger herre. Abpt.
Wulfinch. tze Chötweich. tzu versetzen vnd tzu verchavffen. also. Daz ich vnd mein havssvraw. vnd vnser erben. Den selben tzehent. an niemant
verwandeln schullen. mit verchavffen noch mit versetzen. noch mit dhainer andern wandlung. denn mit des hant. der tzu den tzeiten
Abpt. vnd herre ist. avf dem Chötweich. vnd mit dhains amptmans oder Richter hant nicht. wader haimleich noch offenleich.
Waer aber daz ich daz. oder mein havssvraw. oder vnser erben. indert vber giengen. So schol allez daz recht. dem Gotshavs tze chöt
weich. vervallen sein. daz wier an dem oftgenanten tzehent gehaben mugen. Vnd der sache. vnd avch des gelubs tzu ainem getzeug
vnd avch tzu ainem vrchund. Gib ich dem vorgenanten. meinem herren. Abpt. Wulfingen. vnd seinem gotshavs tze chotweich disen
prief. versigelten. mit des erbern herren hern. Otten. von Wildekk. Insigel. Vnd mit hern Leiven Insigel des Truchsaetzen
tzu den tzeiten Richter tze holnburch. die der sache getzeug sind mit ieren Insigeln. Der prief ist gegeben. do von christes
gepuerd waren ergangen. Dreutzehen. hundert Iar. dar nach in dem tzwey vnd viertzigisten Iar. an sand Iohannes tag
tze Sunnwentten.