Ich Dietreich von Weizzenpach Verich vnd tuen chunt Allen den die disen prief an sehent
oder horent lesen Daz ich mit verdahtem muet vnd mit guetem willen meiner haussfrawn vnd
meines suns Dietreichs vnd aller meiner Erben tzu der tzeit do ich ez wol getuen maht han
gesatzt dem Erbern herren Abpt Wulfingen tze Chotweyg vnd seiner samening mein
Erbvogtte vber den hof datz Drietigest vnd vber allez daz dor tzu gehort tze veld vnd
tze dorff versuecht vnd vnversuecht swie daz genant ist mit allem dem rechten Als ichs in
nutz vnd in gwer her pracht han vmb Viertzich pfunt pfennig wienner gemainer munizz
der ich gar vnd gantzlich gewert pin Also mit peschaidner red Wan ich oder mein
Erben dem vorgenanten herren oder wer Abpt ist datz Chotwig gib viertzich pfunt pfen
ning so ist di vorgenant vogtte wider mein vnd meiner erben als vor di weil des
nicht geschieht so schol ich vnd mein Erben mit der vorgenanten vogtte nicht geschaf
fen haben vnd mugen si di weil genemen tzu einem vogt wen si wellent Ich schol auch
vnd mein sun Dietreich vnd mein Erben des vorgenanten satzes schern vnd gewer
sein fur all ansprach als satzes vnd Landes recht ist tze Osterreich Vnd daz daz staet
vnd vntzebrochen beleib gib ich vorgenanter Dietreich dem erbern herren Abpt Wulfing(en)
tze Chotweyg vnd seiner samening disen prief versigelten mit meinem Insigel vnd
mit meins suns Dietreiche Insigel Dor tzu sind auch der sache gezeug mit ieren
Insigeln di Erben herren mein Ochem her Dietreich vnd her Stephan von Hohenberch
her Ott von Wildekk Der prief ist gegeben do man tzalt von Christi gepurd Tausent
Jar Dreu hundet Jar dor nach in dem Dreuvndviertzigisten Jar des sunntags
tze mittern vasten