Ich Weikhart der Otaimpech vnd ich Hainreich sein prueder vnd vnser haussfrawn
vnd all vnser Erben veriehen offenbar an disem prief daz wir mit guetleichem
willen vnd mit gunst aller der di daz an gehoert hat tzu der tzeit do wir ez wol
getuen mochten verchauft haben allez daz erib daz wir gehabt haben von dem Gotz
haws tze Choetweyg swie daz genant ist ein halbz Lehen vnd swaz dor in gehoert
hat vnd allz vnser purchrecht Hoffstat Weingarten Akcher swie wir ez gehabt
haben vnd vns von vater vnd von mueter an geeribt hat do haben wir pfennig
vmb enpfangen vmb igleichz besunder nach seinem wert der vns zu den selben
tzeiten vnd auch nu wol genuegt vnd auch gar vnd gantz gewert sein vnd
schullen auch des selben halben Lehens vnd Hoffstat Weingarten vnd Akcher
vnd swaz dor in gehoert hat vnd alles des purchrechtes daz wir verchauft
haben swo daz vmb den Choetweyg gelegen ist schirm vnd gwer sein fur all
ansprach als Landes recht ist vnd schullen seu daz haben auf alle dem vnd
wir haben in dem Land tze Oesterreich Vnd tzu einer pezzern sicherhait ge
ben wir in disen prief versigelt mit vnsern paiden anhangunden Insigeln
Der prief ist gegeben do man tzalt von Christi gepurd Dreutzchen hundert
iar dor nach in dem dreu vnd viertzkisten iar an sand Michls tag