Wir Graf Ludwig von Oting der alt Veriehen vnd tuen chunt an disem Prief allen den
diu in sehent oder hoient lesen die nu sind oder her nach chunftig werdent. Daz wir vnsern
Weingarten datz Hohnburch der gelegen ist ob dez Purchstals vnd vnser rechtes chaufguet ist. dez sind
vierdhalb Jauch vnd ist dez Gotzhaws grunt von Freysing vnd dient man do von alle iar an sand
Michels tag dem selben Gotzhawe tze Freysing vier pfennig Wyenner gemainer muzz tze purchrecht
vnd Guetmans chinden vier pfennig tze purchrecht vnd ainen halben Emmer weins tze perch
recht an den vorgenanten sand Michels tag. Den selben weingarten haben wir gegeben den Gaystlichen
Herren Abbt Wulfingen tze Gotweig vnd seiner Samenung tze ainer pezzrung vmb den
schaden den daz Gotzhaws von vnsern wegen genomen hat auf seinen guet tze Chotans Vnd auch
tze pezzrung irer pfrunt durch vnser vnd vnser voder sel hailes willen wand wir ebigen Pruederschaft
mit in haben Daz siu mit dem selben Weingarten allen iren frumen schaffen schullen. in
versetzen in verchäuffen vnd geben wem si wellen Vnd schullen ower da in schirm vnd in gewer
sein fur alle ansprach als Landez recht vnd purchrechtz gewonhait ist in Osterreich Vnd daz
in daz stät vnd vntobrochen beleib Dar vber geben wir in disen offen prief versigelten mit
vnserm anhangunden Insigel. Dar tzue sind auch getzeug mit iren Insigeln der edel Herr
Herr Jans von chunrig obristor Schench in Osterreich Vnd Leb der Pruchster tze den zeiten Richter
tze Hohnburch Vnd ist der prief gegeben do man tzalt von christes gepurd Dreutzehen hundert
iar dar nach in dem dreu vnd viertzigsten iar an Sand Merten tag : - : -