Ich Albrech(t) der Talinger vnd ich Magdalen(n) sein hausvrowe vnd alle vnser Erben. Wir verge
hen an disem brief vnd tůn chvnt allen den die in sehent vnd lesent horent die nv lebent vnd her
noch chvnftich sint. Daz wir mit wol verdachtem mvt vnd mit vnserm gůtem willen ze der zeit
do wir iz wol getůn mochten. Haben zechauffen geben Cholman(n) der Porleiten vnd seiner haus
vrowen vrowen Wenteln vnd ir payder Erben vnsers rehten Aygens ein Lehen in dem Aychbach in
Ruprechtzhower pharre mit allem dem nvtz vnd recht vnd daz zvo gehort versvcht vnd vnversvcht
vmb zwen vnd zwaintzich phvnt wienn(er) phenning der wir gantz vnd gar gewert sein vnd schaffen
ouch do mit allen irn frum zeversertzen oder zeverchauffen wenn sev wellen an allen irrsal wir
sein ouch des vor gnant(en) Lehens ir schirm vnd ir Gwer fvr alle ansprach als Aygens recht ist
vnd sit vnd gewonhait in Osterreich. tet wir des nicht nemen sev dar vber chaenn schaden mit recht
den schaden schulle wir in abtůn Wer dann Landes herre ist in Osterreich oder Hauptman an seiner
stat der schol in vnsers gůtes das wir haben in Osterreich so vil in antwvrten fvr hauptgůt vnd fvr
schaden daz in aller ir schade gantz vnd gar werde abgelegt mit vnserm gůtem willen an chlag
vnd an fvrbvt vnd an alles Recht Daz dise rede stet vnd vnzerbrochen beleib dar vber geb wir Ich
vorgnant Albrech(t) der Taling(er) vnd mein hausvrowe vrowe Magdalen(n) vnd vnser Erben Aigen bri
ef dem vorgnant(en) Cholman(n) vnd sein hausvrowen vrowen Wenteln vnd irn Erben zvo ainem vr
chvnt vnd zvo ainer bestetigung diser sache versigelt mit meinem hangundem Insigel vnd sint der
sache gezeug mein pruder Chvnt(z) der Talinger vnd Wernhart der Porleiten mit irn hangundenn
Insigeln Der brief ist geben do man zalt von Christes gebvrt Dreutzehen hvndert Iar vnd
in dem vir vnd viertzigistem Iar an dem Plvmvster tag