Ich Hans h(er)r Herbartes sun an der Dreimsen und mein Hausvrow und alle unser erbn Wir veriehen
offenbar an disem p(ri)f und tun chunt alle den di in sehent oder horent lesen daz wir recht und redleich und zu
den zeiten do wir z wol teten taten ze chouffen gebn habn dem Ersamen Wirdigem h(er)ren Abte Wulffing
ze Chotweic und dem Conuent und alle irn nach chomen do selbn zwelif phenig purchrechtes di wir
gehabt habn auf eim haus daz do leit daz stet in eim hoff ze negst dem purichtor umb n(eun) phunt
gut dez wir gancz und gar gewert sein Wir habn auch in di vorgenante zwelif phenig purchrechtes ze chouffen
gebn mit alle dem rechtem und man uns alle iar an sand Michels tag gedient hat und wir iz von unsern vor
vod(er)n von alter in purchrechts reht pracht habn Wir habn auch in daz selbn purchecht ze schirmb und
fur ze chumen als purchecht recht ist in dem lant ze Osterreich oder naeme si dar an icht schaden mit ansprach oder
mit nach raisen oder swie der schad genant wer den ir diener ainer bei sein trewn ungesworn gesprechen mocht
den selbn schaden schull wir in ab tun und schullen in darnach habn auf uns und auf alle di und wir gueter
habn und daz sul wir in allez stet gehabn mit unsern trewn Und dar ub(er) geb wir in disen p(ri)f mit uns(er)m
Insigel zu einem urchunt diser sach wir habn auch gepeten di Erbn leut h(er)rn Otn von pacz zu den zeiten
purchg(ra)ff daz stet und Michel den Kelling daz in di auch ir iew Insigel an disen p(ri)f habnt gelait zu einem
gezeug diser sach Der p(ri)f ist gebn do man zalt von zalt von christes gepurt Tausent iar Dreuhundert iar und
dar nach in dem funf und Virczigistem Iar die sancti Andree Ap(osto)li