Ich Margret Hænsen wib des Heindlins dem Got genad Verich offenleich an
disem prief Daz mir der Erber mein genediger herr Abt Wulfinch datz dem
Chotweich den hof ze Haczendorf der mich an gevallen ist tze leibgeding
von meinem wirt seligen gelihen hat zu purkrecht daz ich im do von dienen
schol all iar an sand Michels tag ainen pfennich purkrechts vnd nicht mer
Taet ich des nicht so get furbaz wandel dar auf als purkrechts recht ist
vnd landes gwonhait ze Oesterreich. Vnd daz daz furbaz stet vnd vngebrochen
beleib gib ich dem egenanten meinem herren abt Wulfingen vnd seinem gots
haus disen prief versigelten mit meiner Ohaim Insigel Wolfarts des wierts
Richter ze Grauenwerd. vnd Hainreichs des wierts zu den zeiten Richter datz
Holnburch di der sache gezeug sind mit ieren insigeln wan ich aigen Insigel
nicht enhan. Vnd ist der prief geben do man zalt von Christi gepuerd dreu
zehen hundert iar dar nach in dem sehs vnd vierzigsten iar an sand Thomas tag