Wier Hainr(ich) von gotes gnaden chunch ze Behem vn(d) ze polan vn(d) herzog ze kernde(n) Graf ze tyrol vnd ze Gorcz Herr d(er) Goczhaus ze Aglay ze trient
vn(d) ze Brixen / chvnden an disem prief vnd tvn chunt alle den die in sehent oder horent lesen daz der Erber Herr apt . f(ri)d(e)r(ich) . von sannt pauls
an dem lauenttal an seines conue(n)ts stat apt . wernhers . dem got gnad / weilen vnsers vitzetvm in karnde(n) vnd an chvnig gerat hat auf ain ende
vor Hain(rich) . dyetreich . dem pfarrer ze sannt veit / vitzetvm in kernde(n) vn(d) vor vnsern getrewen . chvnrat . von husenstain vn(d) chvnrat . ze straz
nach den wir vollen gewalt hietn gegebn getaen die raitung d(er) varndn d(er) vor gena(n)t apt . w(ernher) . getan vn(d) vns mit vns(er)m versigelten priefen alles
daz daz sein vater in genome(n) het die wail vnd er vitzetvm waz von den amptleute(n) an chande(n) an chrain vn(d) ze windischgrez vn(d) beliben wir im hin
aber schuldig mit s(el)b(er) raitung wol drew hvnd(er)t March Aglay(er) d(er) vns apt . f(ri)d(e)r(ich) . d(er) vor genant ledich hat gelazzen auf vns gnad vn(d) swa vns
got wird ze land senden so sulen wir im vnd seim Goczhaus die hantvest die wir apt . w(ernher) . seligem gabn vber dew drew gut ze hochlich ze
trahous vnd ze Gvndramsdorf baz belewten vnd vernevn / nach vnsers vater rat . Wier haben auch von dem vor genante(n) apt . f(ri)d(e)r(ich) . in genomen
alle die prief die sich apt w(ernher) . selich / walt vns(er) burgen / verwe vn(d) nicht verricht also daz wir die selbe gult die er vns(er)n edeln leute(n) gelte(n) solt
als in den vor genante(n) priefen stat auf genome(n) haben / gegetn vn(d) stet in vn(d) seinem Goczhaus von d(er) selben gult an alle schaden springe(n) daz er
vn(d) sein Goczhaus furbas vmb die gult nimm(er) mer betoret vnd bechumbert werden / Vn(d) sint daz die prief des Ersten Grafen f(ri)d(e)r(ich) . von haimburch ain vmb
vierzech march silb(er) geweges . Gotfrides . von cruchp(er)g drei vmb sein purkchut Hainr(ich) . von silande ain vmb zwainzech march friesacher phening . Reinkeres
des schenchen von osterwitz ainer vmb drei march Aglay(er) . f(ri)d(e)r(ich) . des purkchraui ain vmb zehen march silb(er) . vnd Eberhartes ze sannt pet(er) ain vmb
sechzech march Aglay(er) . swer auch vns prief ist mer die apt . w(ernher) . selich d(er) vor gena(n)t in genome(n) hiet vnd sein nicht verricht hiet die haben wir auch
auf vns genome(n) vnd sulen sein verrichte als da vor geschrib(e)n stat . vnt(er) lazze(n) auch den vor genante(n) apt f(ri)d(e)r(ich) vn(d) sein Goczhaus ledich ab vns(er) amptleut
an kernde(n) in chrain vn(d) ze windischgrez . apt . w(ernher) . seligen prief icht funde(n) daz im die noch seim Goczhaus furbas nicht suln zeschade(n) chome(n) / hietn auch di
vor genante(n) amptleut von apt . w(ernher) . selige(n) nicht prief genome(n) oder colte(n)t schaft od(er) and(er) sach daz sol dem vor genante(n) . apt . f(ri)d(e)r(ich) . seim nach chome(n) vn(d)
dem vor genante(n) Goczhaus furbas nicht zeschade(n) chome(n) Auch sol man . chvnrat . dem schilher d(er) von sannt veit . vn(d) Johansen dem wames von chlagenfurt
an ir raitung legn die prief die in apt . f(ri)d(e)r(ich) . d(er) vor gena(n)t fur seine vater geben hat . Vnd daz alles dem vor genante(n) apt . f(ri)d(e)r(ich) . seim nachome(n) vnd de(m)
vor genante(n) Goczhaus stet vn(d) vnzerbroche(n) behalte(n) dar vmb geben wier im dise prief versigelten mit vns(er)m anhangende(n) insigel . Vnd sint auch des gezeug
die vngena(n)ten drey herer d(er) raitung . Herr Hainr(ich) d(er) probst ze volchenmar . Herr Hainr(ich) pfarr(er) ze treuen . peter . vn(d) vl(ri)ch . prued(er) von liebenberch .
Hainr(ich) . von silberb(er)ch . vn(d) f(ri)d(e)r(ich) . der chanol . Der prief ist geben . daz sannt veit . nach christes geburt . dreyzehen hvnd(er)t iar / vnd dar nach in dem vier
zehende(n) iar des phincztiges nach sannt Ruprechts tach