Wir Hainr(ich) von gotes gnaden chünich ze Beheim und ze polen. h(er)tzog ze slesien. gräf ze lüzel(burg)
und ze laRoch. verjehen an disem briefe. Daz wir sunderlichn durch got. und durch unser. und unser
vord(er)n sele willen. dem apt ze wiltain. und dem covent da selbn geantwurt. und geben
habn. ze ainen rehten aigen. den hof auf dem gelaez. ob dem prener ze griesenwalde. d(er)
wailend Rüdg(er)s von slosperch. und sein sune. Rüdg(er)s. und Dietreichs waz. für a(n) d(er)thalb
hundert march silb(er)s. und habn daz getan. nach Rät. und durch gut willen. chünrats. dez
phäfs. und wailend Dietreichs von ebn. und and(er) ir naehsten friunde. und d(er) vorgen(anten)
schulde pfenning. w(er)dn. die vorgenanten. Dietr(eich). und Rüdg(er). dez egnanten wailend Rüdg(er)s
sün von slosperch. dem vorgenanten Gotzhus ze wiltain schuldig wordn mit reht(er) chäufung. von
niun gultaen. vier. und vierzich march pfen(ning). Die übrigen fümfzehn march. habnt si gebn
Hainreichen dem welfe von sarntein. die wir im von sunder gnaden von d(er) ebsiun dez
vorgenanten hofs geschaffn heten. und gehaizen daz vorgenant Gotzhus. für uns. und
für unser erbn. an dem selbn hofe. ze schirmen. und ir gew(er). dar über ze sein. gen
mennichlich. nach den rehten. und gebn in dar ub(er) disen brief besigelt. ze ainem urchünde
mit uns(er)m hangendem Ingsigel. D(er) brief ist gebn ze Brixen. nach christs geburt. Driuzehn
hundert Iar. und darnach in dem aht. und zwainzigistem Iar. an sand Egidien tag :~:~